Profesori i shkencave politike, Dritëro Arifi duke folur për Asociacionin e komunave me shumicë serbe, ka thënë se nëse Qeveria nuk e ka në plan ta formojë atëherë duhet ta zhbëjë marrëveshjen.

“Janë shumë gjëra, janë shumë veprime. Nga pika A në pikën Zh ka shumë hapësirë për të manovruar edhe s’ka. Na e kemi ratifikuar në Kuvend një marrëveshje dhe nëse e ratifikon në Kuvend një marrëveshje, dihet se cilat janë procedurat, ose e bën ose e zhbën. Pra, Qeveria sa fol fjalë të kota le ta zhbëjë dhe pikë, edhe e mbyllim këtë storie”, ka thënë Arifi.

Ai shton se do të jetë e pamundur të bindet Serbia që të njihet Kosova, nëse nuk ka koordinim me ShBA-në.

“E dyta, krejt po pajtohna po qysh ki me realizu ti një veprim tëndin, qysh e realizon? Le të më tregon dikush qysh e realizon. S’po mujna kryetarët në veri me i mbajtë e po dojna me detyru Serbinë me na njoft, d.m.th nuk ka logjikë. E vetmja mënyrë me arrit atë është veç me ShBA-në, përndryshe prej pikës A në pikën B nuk mundesh me shku. Sepse realpolitika në fund të ditës t’i determinon krejt veprimet…Na me Serbinë nuk kemi punë. Me Serbinë nuk mund të zgjidhim kurrgjë hiç ama bash kurrgjë hiç. Serbia ka m’i nënshkru 500 marrëveshja dhe kurrë nuk ka m’i zbatu. Historia na ka dëshmu – Rambuje, Ahtisaari. Serbia ka ikë prej krejt këtyre marrëveshjeve dhe në fund i kena ban ë mënyrë unilaterale. Përfundimi i krejt kësaj sage ka me shku me ni zbatim unilateral”, ka thënë Arifi në Këndin e Debatit në Tëvë 1.

Arifi shton se Kosova nuk duhet ta presë përfundimin e konfliktit në Ukrainë dhe një rezultat ku rusët fitojnë në lindje një autonomi të zgjeruar.

“Na po e harrojmë çka tha Escobari. Ai tha që nëse Kosova synohet me zbatu marrëveshjen, ne kemi me u zotu që me bë një ofensivë globale për njohjen e Kosovës…Gjeopolitika po ndryshon. Po ndryshojnë marrëdhëniet ndërkombëtare. Nuk e dimë se si ka me përfundu konflikti në Ukrainë, nuk dihet ende. Dhe ne nuk guxojna me pritë me përfundu një konflikt me përfundu me një marrëveshje ku atje rusët në lindje dhe në Krime fitojnë një autonomi të zgjeruar. Këtë nuk e dimë dhe nuk guxojmë të presim atë rezultat. Duhet ta zbatojmë atë që jemi marrë vesh”, përfundoi Arifi.