Trajneri italian, Carlo Ancelotti ka marrë përsipër detyrën e stolit të ekipit kombëtar brazilian dhe do t’i bashkohet atyre pas përfundimit të sezonit me Real Madridin.
Me këtë transferim, Ancelotti thuhet se bëhet trajneri më i paguar në botë që udhëheq një kombëtare, me një kontratë me vlerë prej rreth 10 milionë euro, e cila do të zgjasë deri në fund të Kupës së Botës 2026.
Presidenti i Federatës Braziliane të Futbollit (CBF), Ednaldo Rodrigues, tha se ardhja e Ancelottit ishte “më shumë se një veprim strategjik”, duke nënvizuar vendosmërinë e federatës për ta rikthyer Brazilin në krye të futbollit botëror.
“Ai është trajneri më i madh në histori dhe tani është në krye të ekipit kombëtar më të madh në planet. Së bashku do të shkruajmë kapituj të rinj në historinë e lavdishme të futbollit brazilian”, ka thënë Rodrigues.
Ancelotti po i thotë lamtumirë Real Madridit pas katër vitesh plot trofe, me të cilët fitoi dy La Liga dhe dy Liga të Kampionëve gjatë kohës së tij të dytë. Edhe pse Klubi mbretëror e mbyll sezonin pa një trofe, respekti mbetet për arritjen e tij.
Brazili, me Ancelottin në krye, tani shikon drejt verës së ardhshme dhe një përpjekjeje të re për pavdekësinë e futbollit. /Telegrafi/
