Analisti politik që jeton dhe vepron në SHBA, Bleron Baraliu në një analizë të shkurtër ka treguar arsyet se përse zgjedhjet e 28 dhjetorit janë metoda e vetme për të ndalur regresin dhe përse PDK-ja është zgjidhja më e mirë e mundshme në këto zgjedhje.
Sipas tij, ani pse PDK-ja nuk është në ditët më të mira të saj, prapëseprapë është mundësia më e mirë për të tejkaluar krizat politike që kanë kapluar Kosovën.
“Në zgjedhjet që po vijnë ndryshimi është metoda e vetme për të ndalur regresin e rrezikshëm dhe deformimin e panevojshëm të marrëdhënieve Kosovë-ShBA, është rruga drejt modernizimit dhe progresit, drejt depolitizimit dhe pajtimit kombëtar”, ka thënë Baraliu.
“Të gjithë e dini se unë kam qenë për një garë të vërtetë me gjeneratës në ardhje dhe Bedri Hamzës dhe kundër zgjedhjes së tij në krye të PDK-së me aklamacion. Bedri Hamza nuk nxit as entuziazëm të shtuar e aq më pak frymë revolucioni (që i duhet vendit dhe kombit këto ditë). Edhe vet PDK është larg nga ditët e shkëlqimit të saj gjatë kohës së betejës për pavarësi dhe konstruktivitet politik”, ka thënë ai.
Sipas Baraliut, nëse votohet VV-ja do të vazhdojë polarizimi e ngërçi politik.
“Por, prapëseprapë PDK është larg zgjidhja më e mirë e mundshme në këto zgjedhje. Fatkeqësisht, në mungesë të alternativave të reja vota për PDKnë kësaj radhe është obligim qytetar ndaj gjeneratave të reja dhe të ardhmes sonë — sepse një kapitull shtesë i polarizimit, ngërrçit politik, kacafytjeve partiake e dezintegrimit shoqëror, kam frikë, do të ishte vërtetë një kapërcim i pakthyeshëm në shkatërrimin e shtetit dhe kombit”, ka thënë ai.
“Unë jam në dijeni të plotë të dilemave morale e filozofike, e kuptoj qartë që përgjegjësia për demolimin e shtetit në dhjetë muajt e fundit bie mbi gjitha partitë politike, jo vetëm mbi VVnë e LDKnë si acaruese kryesore, por këto zgjedhje duhet të prodhojnë një ribalancim politik që shtyn drejt mirëkuptimit dhe bashkëpunimit në vend të acarimeve dhe barrikadave kundër njëri tjetrit dhe kundër aleatëve të jashtëm”, ka theksuar Baraliu.
“Ky ribalancim konstruktiv mund të vie vetëm me një PDK që i merr 28-30% të votave, që duket krejtësisht e arritshme në kushtet e tanishme — krahas një VVje me 33-35%”, ka sqaruar ai.
“Në e doni kombin dhe vendin, harroni preferencat e ngushta politike dhe votoni me arësye të shëndoshë për të ardhmen e fëmijëve tanë. Jo për një individ apo për një parti, por për një rikonfigurim politik që detyron bashkëpunim të brendshëm dhe të jashtëm — që obligon koalicione në vend të ngërçit, që i reziston mujsharëve ndërkombëtarë duke bashkëpunuar me aleatë dhe jo duke luftuar me ta deri në përjashtim dhe sanksione”.
