Gjykata Themelore në Prishtinë e ka dënuar me 15 vjet burgim të akuzuarin Çedomir Aksiq për krime lufte në periudhën janar-maj 1999 në fshatrat e Komunës së Shtimes. Ky gjykim është zhvilluar në mungesë.
E për këtë çështje, Anëtari i Fondit për të drejtën humanitare, Amer Alija ka thënë se sipas Gjykatës Supreme ky është maksimumi i dënimit.
“Sot ka qenë aktgjykimi i parë në mungesë për krimet e luftës në Kosovë, ky është aktgjykimi i parë në praktikën gjyqësore të Kosovës , i njëjti është dënuar me 15 vite burgim për krimet e luftës të cilat kanë ndodhur në rrethinën e komunës së Shtimes dhe në qytetin e Shtimes. Sanksioni apo dënimi prej 15 viteve, sipas mendimit të Gjykatës Supreme e cila ka jap opinione në rastet e kaluara është maksimumi i dënimit për krimet e luftës sipas ligjit në fuqi i cili ka qenë pra sipas ligjit të RSFJ-së. Në rastet e krimeve të luftës nuk mund të shqiptohet dënimi më i madh se 15 vite dënim, edhe pse ndoshta sipas mendimit tim, unë konsideroj se në rastet e krimeve të luftës mund të shqiptohet dënimi prej 20 viteve burgim për arsye se me ligjin që ka qenë në fuqi minimumi dhe maksimumi ka qenë 5 deri 15 vite burgim dhe 20 vite burgim për veprat penale të cilat janë të dënueshme me dënime me vdekje”, ka deklaruar ai në emisionin “Ditari” në Tëvë1.
Madje, ai ka thënë se do të ketë persona të akuzuar dhe të dënuar në mungesë.
Po ashtu ai ka bërë të ditur se që nga viti i kaluar e deri më tanë kanë qenë 13 aktakuza të ngritura në mungesë dhe 60-70 persona të akuzuar në mungesë.
“Sa i përket statistikave do të kemi shumë aktakuza dhe do të kemi shumë persona të akuzuar dhe të dënuar në mungesë që nga viti i kaluar e deri më sot janë ngritur diku 13 aktakuza në mungesë kundër ma shumë se 60-70 persona të akuzuar në mungesë. Ligjvënësit kanë bërë disa hapa procedura që duhet të përmbushen para se të ngrihet aktakuza, hapi i parë sigurisht që është ftesa, kontrollimi i adresës ku jeton”, shtoi ai ndër të tjera.
