Shpërthimi i pakënaqësive në Lidhjen Demokratike të Kosovës do të ketë fundin e njëjtë sikurse të Lëvizjes Vetëvendosje më 2018, paralajmëroi sot gazetari Vehbi Kajtazi.
Gazetari tha se përplasja e brendshme në LDK, e cila është shpërfaqur hapur me publikimin e disa mesazheve në një grup në Viber të anëtarëve të kryesisë, do të prodhojë skenarin e njëjtë sikurse të ndarjes së Lëvizjes Vetëvendosje para shtatë vitesh.
Ndarja e një grupi të konsiderueshëm të deputetëve, përfshirë ish-kryetarin dhe sekretarin organizativ të LVV-së ishte inicuar nga publikimi i disa mesazheve në një grup në Viber të një rrethi të ngushtë të zyrtarëve të Vetëvendosjes.
Kajtazi tha se situata mes dy rasteve “është shumë e ngjashme”.
“Kjo ‘skema kriminale’ ne LDK eshte shume e ngjashme me ate “mutin” ne Vetevendosje. Para shperthimit te kanalizimit eshte”, tha Kajtazi.
Të hënën, portali Reporteri publikoi një seri mesazhesh të shkëmbyera mes anëtarëve të LDK-së në një grup në Viber, të cilat nxjerrin në pah shpërthimin e pakënaqësive të brendshme për procesin elektoral.
Sipas mesazheve, Arben Gashi e cilësoi ‘skemë kriminale’ procesin e votimit në diasporë, duke shprehur dyshime për përfshirjen e partisë në manipulimin e votave brenda listës.
“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, tha Arben Gashi.
Nënkryetari Kujtim Shala iu përgjigj Gashit.
“Asnjë manipulim nuk është i tolerueshëm”, i tha ai.
“Kujtim, qitja emrin, nuk është manipulim, është skemë e organizuar kriminale. Pa e identifiku sakt problemin nuk mundemi me e shpëtu partinë”, shprehu shqetësimin e tij Gashi.
Lumir Abdixhiku i quajti “sulme të paramenduara dhe në sinkron” ndaj LDK-së mesazhet e publikuara të hënën.
Kryetari i LDK-së tha se për këto sulme janë bashkuar kundërshtarët e rinj dhe të vjetër të partisë.
“Në këto sulme të paramenduara e në sinkron, janë bërë bashkë kundërshtarët e rinj e të vjetër të Lidhjes; dhe gjithë ata që ndjejnë se kanë humbur hapin me hapjen e madhe që në LDK ka ndodhë, po ndodhë dhe do të ndodhë”, shkroi Abdixhikut në Facebook të martën.
Ai tha se këto janë tema të brendshme, për të cilat ka thënë se janë diskutuar tashmë në kryesi. /Paparaci.com
