Reperi dhe producenti muzikor Jay Z është paditur për përdhunimin e një vajze 13-vjeçare, bashkë me Sean “Diddy” Combs. Ngjarja, sipas padisë, ka ndodhur në vitin 2000.
Në padinë e regjistruar të dielën pretendohet se Jay Z, emri i vërtetë i të cilit është Shawn Carter, si dhe Combs, përdhunuan vajzën në një “after-party” pas “MTV Video Music Awards” në shtator të vitit 2000.
“Një tjetër person i famshëm qëndroi dhe pa ndërsa Combs dhe Carter abuzuan me të miturën. Shumë të tjerë ishin të pranishëm, por nuk bënë asgjë për të ndaluar sulmin,” thuhet në padi. “Carter ka qenë me Combs gjatë shumë incidenteve të tjera të përshkruara këtu. Të dy duhet të përballen me drejtësinë.”
Combs, i njohur gjithashtu si Diddy, aktualisht është në burg dhe përballet me akuza për trafikim seksual dhe krime të tjera.
Personi që ka ngritur akuzat nuk është identifikuar ende.
Jay Z reagoi duke akuzuar avokatin që po mbron çështjen në fjalë. Ai e quajti atë një “njeri të shëmtuar”.
“Avokati im u shantazhua, përmes të ashtuquajturës letër kërkese, nga një ‘avokat’ me emrin Tony Buzbee. Ajo që ai kishte llogaritur ishte se natyra e këtyre akuzave dhe shqyrtimi publik do të më bënte të doja të zgjidhja. Jo zotëri, ka pasur efektin e kundërt! Më bëri të dua t’ju zbuloj ju për mashtruesin që jeni,” tha një deklaratë ai.
Buzbee, avokati që po mbron çështjen kundër Jay Z, i tha agjencisë së lajmeve AFP, “Padia flet vetë. Kjo është një çështje shumë serioze që do të gjykohet në gjykatë.”
