Aktorja, komediania dhe skenaristja e famshme amerikane, Tina Fey, bëri një deklaratë në lidhje me të ardhmen e inteligjencës artificiale këtë javë, duke folur në Festivalin Televiziv të Edinburgut.
Ylli 55-vjeçar, i njohur më së miri për serialet “30 Rock” dhe “Saturday Night Live”, preku tema të shumta në ditën e fundit të festivalit, më 22 gusht, me theks të veçantë në të ardhmen e industrisë së argëtimit dhe rolin në rritje që inteligjenca artificiale mund të luajë në krijimin e artit.
Zhvillimi i teknologjisë ka shkaktuar shqetësim të madh midis shkrimtarëve të filmave dhe televizionit, vendet e punës të të cilëve mund të kërcënohen.
Konkretisht, inteligjenca artificiale ka arritur tashmë të krijojë muzikë origjinale që nuk dallohet nga muzika njerëzore, dhe një grup i tillë i inteligjencës artificiale madje arriti në krye të listave të Spotify.
Megjithatë, Fey nuk duket se ka frikë se inteligjenca artificiale do të pushtojë botën e televizionit dhe filmit.
Duke iu drejtuar audiencës, Fey deklaroi: “Inteligjenca artificiale mund të bëjë të gjitha llojet e gjërave të tjera të frikshme, si të shkruajë muzikë, por për momentin nuk mund të jetë qesharake”.
Fjalët e saj mbështeten nga një eksperiment i vitit 2023, kur gjatë grevës së shkrimtarëve të Hollywoodit, Hollywood Reporter i kërkoi ChatGPT të shkruante një skenar për serialin ‘30 Rock’ rreth grevës. Rezultati, thonë ata, nuk ishte aspak qesharak, duke sugjeruar që Fey ndoshta ka të drejtë.
Fey vazhdon të ketë sukses dhe së fundmi u vlerësua si bashkë-krijuese e serialit të famshëm të Netflix-it, “The Four Seasons”, i cili është konfirmuar për një sezon të dytë. /Telegrafi/
