E gjithë ngjarja ndodhi mbrëmë. Inspektorati Policor i Kosovës ka dhënë detaje lidhur me rastin.

Në njoftimin e PK’së bëhet e ditur se zyrtari policor s’kishte përshtatur shpejtësinë e automjetit dhe ka kaluar në shiritin e kundërt.

Tutje, bëhet e ditur se është suspenduar zyrtari policor që dyshohet se ka shkaktuar aksidentin.

Njoftimi i IPK:

Tre persona humbin jetën në një aksident trafiku

Prishtinë, 27 janar 2025

Hetuesit e IPK-së mbrëmë rreth orës 19:00 janë njoftuar nga Policia e Kosovës për një aksident trafiku ku ishte përfshirë një automjet zyrtar i policisë dhe një veturë civile.

Pas pranimit të informacionit hetuesit e IPK-së kanë dalë në vendin e ngjarjes duke ju bashkëngjitur edhe ekipeve tjera policore dhe prokurorisë në këqyrjen e vendit të ngjarjes.

Aksidenti raportohet të ketë ndodhur në rrugën rajonale Mitrovicë – Pejë në fshatin Çubrel në ora 18:40.

Bazuar në veprimet fillestare hetimore dyshohet  se aksidenti ka ndodhur si rezultat   i  mos përshtatjes së shpejtësisë së  lëvizjes së automjetit me kushtet e rrugës nga drejtuesi i automjetit zyrtar të policisë i cili  ka kaluar në shiritin e kundërt duke goditur veturën civile.

Si pasojë e aksidentit tre persona (të cilët kanë qenë në veturën civile) një mashkull dhe dy femra fatkeqësisht kanë ndërruar jetë.

Trupat e pajetë të tre viktimave janë dërguar janë dërguar në Institutin e Mjekësisë Ligjore për obduksion.

Lëndime të rënda trupore kanë pësuar katër zyrtarë policorë dhe një qytetar nga vetura civile të cilët janë dërguar në QKUK për tretman mjekësor.

Si pjesë e procedurave administrative dhe në interes të hetimit,  IPK ka rekomanduar suspendimin e zyrtarit policor i cili ka qenë drejtues i automjetit zyrtar të policisë në momentin e aksidentit përderisa lidhur me aksidentin janë duke u ndërmarrë veprime hetimore në koordinim me prokurorin kompetent.