Agjencia Kosovare për Krahasim dhe Verifikim të Pronës (AKKVP), ka reaguar ndaj deklaratave të drejtorit të të ashtuquajturës “Zyre për Kosovën”, Petar Petkoviq i cili kishte dhënë deklarata për një rast pronësor në veri të Kosovës, të cilat AKKVP i quan tërësisht të pavërteta.
Petkoviq kishte propaganduar se disa familje serbe po dëbohen nga apartamentet e tyre. Gjë që mohohet nga AKKVP
Në një komunikatë thuhet se bëhet fjalë për pronën e familjes Ferki Shipolli, është trajtuar që në vitin 2005, ku është vërtetuar se pala është poseduese e ligjshme e pronës. AKKVP zbaton vendime përfundimtare të institucioneve ligjore në përputhje me mandatin dhe kornizën ligjore në fuqi.
Për këtë rikthim të pronës, AKKVP thotë se bëhet përmes procedurave të rregullta ligjore.
“Agjencia Kosovare për Krahasim dhe Verifikim të Pronës (AKKVP) kundërshton ashpër deklaratat e pavërteta të z. Petar Petkoviq lidhur me një rast pronësor në veri të Kosovës, duke i konsideruar ato përpjekje të rrezikshme për politizim dhe dezinformim. Rasti në fjalë, që përfshin pronën e familjes Ferki Shipolli, është trajtuar që në vitin 2005, ku është vërtetuar se pala është poseduese e ligjshme e pronës. AKKVP zbaton vendime përfundimtare të institucioneve ligjore në përputhje me mandatin dhe kornizën ligjore në fuqi”.
“Rikthimi i pronës bëhet përmes procedurave të rregullta ligjore dhe zbatohet ndaj çdo uzurpimi të paligjshëm, pavarësisht përkatësisë etnike apo statusit të palës. Deklaratat e tilla si kjo e Petar Petkoviqit janë të papranueshme sepse nxisin tensione dhe minojnë sundimin e ligjit dhe bashkëjetesën. AKKVP mbetet e përkushtuar ndaj zbatimit të drejtë, të barabartë dhe ligjor të mandatit të saj”, thuhet në njoftim. /Gazeta Express
