Agjencia e inteligjencës ushtarake gjermane (MAD) ka thënë se spiunazhi rus dhe kinez është rritur në vend.

Siç raporton gazeta javore me qendër në Hamburg, ZEIT, shërbimet sekrete të të dy vendeve janë identifikuar si : “aktorët më aktivë të spiunazhit”, sipas raportit vjetor të shërbimit të inteligjencës ushtarake në Bundestag, parlamentin federal gjerman.

“Që nga fillimi i luftës së paligjshme ruse të agresionit kundër Ukrainës në shkurt 2022, Gjermania është pozicionuar duke furnizuar me armë, municione dhe pajisje dhe duke trajnuar pjesëtarët e forcave të armatosura të Ukrainës në Gjermani, dhe për këtë arsye vëzhgohet intensivisht nga shërbimet ruse”, shton raporti.

MAD është shërbimi më i vogël i inteligjencës gjermane, i ngarkuar me mbrojtjen e forcave të armatosura nga spiunazhi, mbrojtjen kundër ekstremistëve dhe kryerjen e kontrolleve të sigurisë për ushtarët dhe punonjësit civilë që punojnë në aparatin ushtarak të vendit.

Muajin e kaluar, agjencia e brendshme e inteligjencës gjermane (BfV) paralajmëroi se spiunazhi, sulmet kibernetike dhe fushatat e dezinformimit, veçanërisht nga Kina dhe Rusia, “paraqesin kërcënim serioz” për vendin.

Gjermania po bëhet gjithnjë e më shumë objektiv për spiunazhin e huaj, tha agjencia, në mes të tensioneve në rritje për shkak të luftës së Rusisë në Ukrainë dhe rivaliteteve intensive midis Washingtonit dhe Pekinit. /Anadolu/