Afrika e Jugut sot shpalli zyrtarisht gjendje katastrofe kombëtare për shkak të përmbytjeve vdekjeprurëse që kanë goditur vendin që nga dhjetori.
Shirat dhe stuhitë e rrëmbyeshme që kanë goditur Afrikën e Jugut dhe Mozambikun fqinj prej disa javësh kanë marrë 30 jetë njerëzish në provincat e Limpopo dhe Mpumalanga në verilindje të Afrikës së Jugut dhe të paktën tetë në Mozambik.
“Unë e klasifikoj këtë si një katastrofë kombëtare”, tha sot në një deklaratë Elias Sithole, kreu i Qendrës së Menaxhimit të Fatkeqësive në Afrikën e Jugut.
Autoritetet janë ende në kërkim të të mbijetuarve dhe po përpiqen të nxjerrin trupat, ndërsa ujërat e përmbytjeve kanë filluar të tërhiqen në disa zona, përfshirë Parkun e famshëm Kombëtar Kruger.
U detyrua të mbyllej tre ditë më parë, por vizitat do të rifillojnë nesër, sipas një postimi në mediat sociale nga Shërbimi i Parkut Kombëtar.
Megjithatë, shërbimi po u bën thirrje vizitorëve të tregojnë kujdes. Në disa rajone të Mozambikut, lumenjtë kanë dalë nga shtrati, duke përmbytur fshatra të tëra dhe duke detyruar mijëra njerëz të largohen.
