Adoleshentët që shkojnë në shtrat më herët dhe flenë më gjatë se bashkëmoshatarët e tyre priren të kenë aftësi më të mprehta mendore dhe të kenë rezultate më të mira në testet njohëse, thonë studiuesit.
Një studim me më shumë se tre mijë adoleshentë tregoi se ata që flinin më heret ia kalonin të tjerëve në lexim, fjalor, zgjidhje problemesh dhe teste të tjera mendore.
Studiuesit prisnin që adoleshentët me zakone të shëndetshme të gjumit të shënonin më mirë se ata që flinin keq, por u befasuan me ndikimin që kishin edhe ndryshimet e vogla në gjumë.
“Ne mendojmë se është gjumi që nxit aftësitë më të mira njohëse, pjesërisht sepse ne konsolidojmë kujtimet tona gjatë gjumit”, tha Barbara Sahakian, një profesoreshë e neuropsikologjisë klinike në Universitetin e Kembrixhit.
Pushimi i mirë gjatë natës ka qenë prej kohësh i lidhur me performancë më të mirë mendore, por studiuesit ende po tregojnë se çfarë ndodh në adoleshencë kur zhvillimi vendimtar i trurit përkon me një zhvendosje drejt orarit të mëvonshëm të gjumit dhe më pak gjumë në përgjithësi.
