Një anketë e re globale tregon se gati një e treta e evropianëve e kalojnë pothuajse të gjithë kohën e tyre në internet. Spanja, Franca dhe Suedia kanë numrin më të lartë të përdoruesve të internetit, ndërsa gjithnjë e më shumë udhëheqës evropianë paralajmërojnë për pasojat e kohës së tepërt para ekranit, veçanërisht tek të rinjtë.
Miliona njerëz në mbarë botën e kalojnë pjesën më të madhe të kohës së tyre në internet, tregon një anketë e re globale.
Në një anketë që mbuloi 24 vende, përfshirë 10 vende evropiane, një mesatare prej 28% e të anketuarve thanë se ishin “pothuajse vazhdimisht” online.
Rezultatet vijnë në një kohë shqetësimi në rritje për varësinë para ekranit, pasi studime të shumta tregojnë se koha e tepërt para ekranit mund të rrisë rrezikun e problemeve emocionale dhe të sjelljes tek fëmijët.
Përqindja më e lartë e përdoruesve që janë pothuajse vazhdimisht në internet është regjistruar në Japoni (56%) dhe Korenë e Jugut (49%), ndërsa normat më të ulëta janë regjistruar në Nigeri (13%) dhe Greqi (14%), sipas Qendrës Kërkimore Pew me seli në SHBA, e cila e kreu anketën në fillim të këtij viti.
Në Evropë, vendet kryesore për sa i përket kohës së kaluar në internet janë Spanja, Mbretëria e Bashkuar, Franca, Suedia dhe Italia.
Edhe pse qasja në internet ndryshon në të gjithë kontinentin, më shumë se 90% e banorëve në këto pesë vende kanë internet me brez të gjerë në shtëpitë e tyre, tregojnë të dhënat nga BE dhe Mbretëria e Bashkuar.
Nga ana tjetër, Hungaria shquhet si vendi me numrin më të madh të qytetarëve që nuk e përdorin fare internetin, me deri në 12% të të anketuarve që thonë se nuk janë online, që është më e larta midis vendeve evropiane të përfshira në anketë.
Megjithatë, në një kontekst global, kjo shifër nuk është e lartë.
Për shembull, në Kenia dhe Indi, përkatësisht 33% dhe 36% e të anketuarve thanë se nuk e përdorin internetin rregullisht.
Pew deklaroi gjithashtu se në të gjitha vendet, brezat e rinj përdorin internetin dhe mediat sociale dukshëm më shumë dhe shpesh janë online pothuajse vazhdimisht.
Vendimmarrësit evropianë po i kushtojnë gjithnjë e më shumë vëmendje këtyre trendeve.
Në një fjalim të kohëve të fundit, Presidentja e Komisionit Evropian Ursula von der Leyen theksoi efektet potencialisht të dëmshme të mediave sociale tek të rinjtë, duke i krahasuar ato me alkoolin dhe drogën.
“Ashtu si në kohën time i mësonim fëmijët të mos pinin duhan, të mos pinin alkool ose të mos shikonin përmbajtje për të rritur deri në një moshë të caktuar, mendoj se është koha të mendojmë për rregulla të ngjashme kur bëhet fjalë për mediat sociale”, tha von der Leyen në një fjalim para Parlamentit Europian më 13 shtator.
Ligjvënësit në disa vende evropiane kanë propozuar tashmë masa të ndryshme, duke përfshirë rregullimin e platformave kryesore teknologjike për të krijuar një mjedis dixhital më të sigurt, si dhe ndalimin e përdorimit të mediave sociale dhe telefonave inteligjentë në shkolla.
Sipas një raporti të UNESCO-s, deri në fund të vitit 2024, dhjetëra sisteme shkollore në të gjithë botën e kanë ndaluar tashmë përdorimin e telefonave celularë në institucionet arsimore.
