Kryeprokurori i Prokurorisë Themelore në Ferizaj, Burim Çerkini në një konferencë të jashtëzakonshme për media ka dhënë detaje të reja lidhur me vrasjen e rëndë të rreshterit, Muhamed Lika mbrëmë në Ferizaj.
Ai tha se në këtë vrasje janë përfshirë dy persona, ende të paindentifikuar për organet e rendit.
I njëjti gjithashtu foli edhe për momentin nga largimi i tyre prej vendit të krimit.
“Nga provat të cilat janë mbledhur, shihen dy persona të cilët kanë ikur nga vendi i ngjarjes, do të thotë nga banesa ku dhe ka ndodh rasti tragjik. Nga ajo që shihet deri më tani është që kanë ikur nga vendi i ngjarjes në këmbë. Nuk kemi informata që kanë shfrytëzuar më vonë ndodnjë veturë apo ndonjë mjet tjetër për ikjen nga vendi i ngjarjes”, tha Çerkini.
Kryeprokurori po ashtu tha se deri më tani nuk ka rezultate që zyrtari policor e ka përdorur armën zyrtare, teksa shtoi se dy personat ishin me kapele dhe jo të maskuar.
Nga të dhënat deri më tani, nuk na rezulton që ka pas shkrepje me armë nga arma zyrtare e pjesëtarit të Policisë së Kosovës. Unë e ceka edhe në fillim që në pamje shihen dy persona duke ikë nga vendi i ngjarjes. Duken persona të rinj, por që nuk kemi arritur indentifikim apo njohjen e atyre personave që me mujtë me e ditë a i takojnë rrethit ku i ka ndodh rasti apo nga janë ata persona. Në mometin kur do të identifikon ata persona, ne do të marrim të gjitha hapat për arrestimin e tyre”.
“Nuk kanë përdor maska, kanë përdor kapela për mbulimin e fytyrës”, shtoi Çerkini.
