Në Gjykatën Themelore në Prishtinë, të mërkurën po mbahet seanca fillestare në rastin ku Faton Klinaku dhe Nuredin Selmani po akuzohen për kanosje të kryeministrit në detyrë, Albin Kurti. Vetë Kurti erdhi në këtë seancë në cilësinë e të dëmtuarit.
Teksa po hynte në objektin e Gjykatës Themelore në Prishtinë, Kurti ishte i rrethuar me truproja. Tre prej tyre i shkuan pas deri kur ai u ul në një nga ulëset e para në sallë.
Kurti në seancë ka thënë se në këtë rast si palë e dëmtuar e përfaqëson veten dhe se nuk do të bëjë kërkesë pasurore-juridike.
Në anën tjetër, Faton Klinaku dhe Nuredin Selmani nuk e kanë pranuar fajësinë për kanosje ndaj kryeministrit Kurti.
Pas përfundimit të seancës, Kurti u pyet nga gazetarët e pranishëm në sallë nëse do të shkojë të dëshmojë edhe për rastin e rezervave shtetërore meqë mori pjesë në këtë seancë.
Kurti s’iu përgjigj kësaj pyetje.
Ai ka refuzuar të shkojë në Prokurorinë Speciale në cilësinë e dëshmitarit në rastin e rezervave shtetërore me arsyetimin se po synohet të prodhohet “lajm botëror” me shkuarjen e tij në prokurori si i përfshirë në korrupsion.
Kurti s’ka zbatuar as vendimin e gjykatës, e cila e ka urdhëruar atë t’i përgjigjet ftesës së Prokurorisë Speciale.
