India synon që të hyjë në histori të mërkurën përmes misionit të saj të tretë hënor, që pritet të lëshohet në polin jugor të Hënës.
Nëse “Chandrayaan-3” bëhet mision i suksesshëm, India do të jetë shteti i parë që lëshon një sondë afër polit jugor të Hënës, që është pak i eksploruar, raporton televizioni BBC.
Njëri nga qëllimet kryesore të misionit është hulumtimi për akull me bazë uji, për të cilin shkencëtarët thonë se do të mund ta mbështeste banimin e njerëzve në Hënë në të ardhmen.
Përpjekja e Indisë vjen vetëm disa ditë pas përplasjes së anijes kozmike “Luna 25” të Rusisë gjatë kohës kur ajo po mundohej të lëshohej në zonën e njëjtë që e synon India.
Nëse arrin sukses, India do të bëhet vetëm shteti i katërt në botë që arrin lëshim të ngadalshëm në Hënë. Më parë, vetëm ShBA-ja, Bashkimi Sovjetik dhe Kina kanë lëshuar pajisje afër ekuatorit të Hënës.
Përpjekja e Indisë për ta lëshuar misionin “Chandrayaan-2” afër polit jugor të Hënës më 2019 ishte e pasuksesshme. Anija kozmike ishte përplasur në sipërfaqen e Hënës.
Organizata Indiane për Hulumtime Hapësinore ka bërë të ditur se planifikon që lëshimin e misionit në Hënë ta transmetojë drejtpërdrejt dhe miliona njerëz pritet që ta përcjellin atë.
Drejtori i kësaj organizate, Sredhara Panicker Somanath, ka thënë se ka besim që misioni “Chandrayaan-3” do të bëjë lëshim të suksesshëm në Hënë.
Ai tha se organizata i ka studiuar me kujdes të dhënat nga përplasja e misionit “Chandrayaa-2” dhe se ka kryer ushtrime simuluese për t’i rregulluar defektet.
