Mungesa e stafit në sektorin e shëndetësisë është problem aktual me të cilin po përballen qytetarët në vend.
E ndër to është edhe klinika e anesteziologjisë, e si pasojë edhe ndërhyrjet kirurgjikale ndaj pacientëve po shtyhen.
Në kushte anonimiteti një 34-vjeçare nga Prishtina, rrëfen për tëvë1 se si rreth tri javë qëndroi në gjendje të rëndë shëndetësore, pa marr shërbimet për shkak të mungesës së anesteziologëve.
“Kam lindë pastaj më është këqsua gjendja dhe kam pasur gur në kanal, kom marr infuzionë çdo ditë madje kur kam pasur dhimbje të mëdha edhe Trodon kam marrë. Mandej kur më është keqësuar gjendja dhe analizat pas 3 jave dmth ata në urologji më thanë që s’ka anesteziologë edhe është e pamundur me u kry operimi duhet me pritë në rend, më ra me pritë tre javë në atë gjendje qysh kam qenë për me hy në operim”, tha ajo.
E përmes një përgjigje elektronike, drejtori i Klinikës së Anesteziologjisë dhe Mjekimit Intensiv në QKUK, Gazmend Spahija, thotë se në mungesë të anesteziologëve edhe lista e pritjës së pacientëve do të shtohet.
“Në pamundësi të ofrimit të shërbimeve anesteziologjike të gjithë pacientëve është e pritshme që lista e pritjes së pacientëve do të shtohet edhe për shkak të mungesës së anesteziologëve. Klinika e Anestezionit dhe Mjekimit Intensiv mundohet të sigurojë në mënyrë proporcionale anesteziologë për 40 njësi punuese (34 salla operative dhe 6 njësi ambulantore) dhe 4 njësi me shërbime 24 orëshe”, tha Spahija.
Sipas tij klinikës së anesteziologjisë dhe mjekimit intensiv vetëm gjatë vitit 2022 i janë larguar 12 anesteziologë.
“Për momentin numri total i anesteziologëve në QKUK është 45. Vetëm në vitin 2022 Klinikës së Anestezionit dhe Mjekimit Intensiv i janë larguar 12 anesteziologë, një është pensionuar dhe një fatkeqësisht ka ndërruar jetë”, shtoi ai.
Ndryshe, mungesa e fuqisë punëtore në vend ka filluar të vërehet dukshëm. Kujdestaritë e gjata, paga e ulët, pasiguria në vendin e punës janë disa nga arsyet që punëtorët po largohen nga Kosova drejt vendeve evropiane. /Teve1/
