Ishte kreu i Deçanit, Bashkim Ramosaj, i cili tregoi se i ka shënuar 10 herë dhe e ka thirrur 48 herë Ministrin e Financave, Hekuran Muratin, por i njëjti asnjëherë nuk i ka kthyer mesazhe dhe as nuk e ka hapur telefonin.
“Për mu tepër i rëndësishëm është komunikimi. Kur nuk ki komunikim, është tepër i zorshëm, sepse ti mundesh me i shkru ma shumë se 10 herë letër, unë kam rast që 48 herë i kom qu letër ministrit dhe kjo është fjalë publike që unë po e themë, i kom qu ministrit të Financave, Hekuran Muratit. I kom qu letër dhe nuk është që është përgjigje ndonjëherë, ose e kam thirr më shumë se 40 herë dhe nuk di a ma njeh telefonin po a s’ma njeh, por kur i shkruj jam kryetari i Komunës, s’paku është dashtë për mirësjellje me thanë jam zënë, apo s’kam kohë.” – ka bërë të ditur Ramosaj, në një intervistë për Kosova Live.
Madje Ramosaj i ka quajtur qeveritarët “inatqorë dhe të mllefosur”.
Që komunikimi me Ministrat e Qeverisë Kurti është i vështirë, e ka thënë edhe kryetari i Prizrenit, Shaqir Totaj, ku ka treguar se “pesë herë” i ka kërkuar takim Ministrit të Kulturës, Rinisë dhe Sportit, Hajrulla Çekut, por se i njëjti e ka refuzuar.
Totaj madje pretendon se përveçse refuzohet nga ministri Çeku për takime “që janë me interes për zhvillim të Prizrenit”, ky i fundit nuk ia kthen përgjigjet as në formë të shkruar.
Në kontrast me ministrin e kulturës, Totaj e vendosi zv/ministrin e Infrastrukturës, Hysen Durmishin, për të cilin tha se “është shembull i mirë i bashkëpunimit”, duke folur për Tv Dukagjini.
“Unë jam përafërsisht gati 2 vjet kryetar i Prizrenit, kam një komunikim shumë të mirë me diplomatë ndërkombëtar, të shteteve të QUINT-it ShBA-së etj…, të cilët vijnë ka dy herë në zyre në Prizren, nuk mund të them të njëjtën gjë për ministrat. Po du me marre një shembull pozitiv te zëvendësministri i Infrastrukturës me të cilin kemi një bashkëpunim të mirë dhe është gatshëm për bashkëpunime…po u jap një shembull të keq, ministri i Kulturës që vjen nga Prizreni, pesë herë i kam shkuar i kam kërkuar takim për tema që janë me interes për zhvillim e Prizrenit, lerë që nuk pranon takim po as nuk ma kthen email-in. Mendoj që është nj shembull jo i mire është një qasje jo e mirë.” – ka thënë Totaj.
Për këtë çështje ka folur Ministri i Financave, Hekuran Murati, i cili tri ditë më parë në konferencë për media pas mbledhjes së Qeverisë është pyetur për deklaratën e kryetarit Ramosaj.
Murati ka thënë se ekziston linja e komunikimit institucional.
“Sa i përket komunave ekziston linja e komunikimit institucional që sa i përket buxhetit komunal ekziston legjislacioni në fuqi që përcakton mënyrën se si përcaktohet buxheti i komunave, që së fundmi e kemi dorëzuar qarkoren e dytë për komunat që janë 742 milionë euro buxhet për komunat.” – ka thënë ai.
Ndër të tjera, Murati ka thënë se nëse në të kaluarën ka pasur ministra që kanë takuar më shpesh kryetarët e caktuar që kanë qenë në të njëjtën vijë politike, edhe sipas tij kjo praktikë nuk ekziston tashmë.
“Nëse në të kaluarën ka pas ministra që kryetarët e caktuar të komunave që kanë qenë në të njëjtën vij partiake i kanë taku pak më shpesh, e kanë bërë përjashtime për kryetar të caktuar kjo praktik nuk ekziston tek ne tashmë, të gjitha komunat janë të barabarta dhe të gjitha komunat e kanë mënyrën e komunikimit institucional me Ministrinë e Financave.” – ka thënë ministri i Financave, Hekuran Murati.
