1 milion myslimanë i bien djallit, pelegrinët e besimit islam kryen ritualin e gjuajtjes me gurë në Mekë
Rreth 1 milion besimtarë myslimanë në Ditën e Sakrificës kanë gjuajtur me gurë murin që simbolizon djallin. Pelegrinazhi me prani kaq të lartë fizike mbahet pas dy vitesh pandemi.
Pelegrinët myslimanë hodhën gurët në ritualin e gjuajtjes së djallit me gurë që shënon fillimin e festës së Kurban Bajramit të shtunën, ndërsa pelegrinazhi i haxhit është duke u mbyllur.
Nga drita e parë, grupe të vogla të adhuruesve bënë rrugën e tyre rreth luginës së Minës, pranë Mekës në Arabinë perëndimore për të hedhur gurët në tre mure betoni që përfaqësojnë djallin ose Satanin.
Rituali është një imitim i vrasjes së djallit me gurë nga Abrahami në tre pikat ku thuhet se Satani u përpoq ta largonte atë nga bindja e urdhrit të Zotit për të sakrifikuar djalin e tij, Ismailin, e cila simbolizon edhe Kurban Bajramin.
Rituali i gjuajtjes me gurë në vitet e kaluara ka çuar në rrëmujë vdekjeprurëse, pasi miliona pjesëmarrës mblidhen në një hapësirë të ngushtë.
Haxhi, zakonisht një nga tubimet fetare vjetore më të mëdha në botë, është ndër pesë shtyllat e Islamit dhe duhet të ndërmerret nga të gjithë myslimanët me mjete të paktën një herë në jetën e tyre.
Në vitin 2019 morën pjesë rreth 2.5 milionë myslimanë nga e gjithë bota.
Por kjo shifër ra në vetëm disa mijëra në 2020 dhe 60,000 në 2021, të gjithë ata qytetarë ose banorë sauditë, ndërsa mbretëria u përpoq të zbuste efektet e pandemisë Covid-19.
Këtë vit, pjesëmarrja u kufizua në një milion besimtarë plotësisht të vaksinuar.
Autoritetet thanë të premten se pothuajse 900,000 ishin të pranishëm, gati 780,000 prej tyre nga jashtë.
Ndalimi i pelegrinëve jashtë shtetit për dy vitet e fundit kishte shkaktuar zhgënjim të thellë tek myslimanët në mbarë botën, të cilët zakonisht kursejnë vite për të marrë pjesë.
Haxhi, i cili kushton të paktën 5,000 dollarë për person, dhe pelegrinazhet që ndodhin në periudha të tjera të vitit janë motori kryesor i sektorit turistik të Arabisë Saudite.
Në kohë normale, ato gjenerojnë rreth 12 miliardë dollarë në vit.
