𝐒𝐤𝐚𝐧𝐝𝐚𝐥 𝐧ë 𝐒𝐡𝐭𝐢𝐦𝐞- 𝐐𝐞𝐦𝐚𝐣𝐥 𝐀𝐥𝐢𝐮 𝐧𝐝𝐚𝐧 𝟏𝟑 𝐦𝐢𝐣ë 𝐞𝐮𝐫𝐨 𝐧𝐠𝐚 𝐤𝐨𝐦𝐮𝐧𝐚 𝐩ë𝐫 𝐤𝐚𝐧𝐝𝐢𝐝𝐚𝐭𝐢𝐧 𝐞 𝐕𝐕-𝐬ë 𝐩ër 𝐚𝐬𝐚𝐦𝐛𝐥𝐞𝐢𝐬𝐭

Dyshohet se në Komunën e Shtimes është duke ndodhur një rast flagrant i konfliktit të interesit dhe keqpërdorimit të parasë publike. Kryetari i Komunës, Qemajl Aliu nga Lëvizja Vetëvendosje, ka nënshkruar vendim për ndarjen e 13 mijë eurove subvencione për një organizatë joqeveritare që drejtohet nga kandidati i tij për Asamblenë Komunale nga LVV, Besnik Brahimi, shkruan Demokracia.com

Më 13 gusht 2025, Zyra e Kryetarit të Komunës ka marrë vendim që të ndajë 13,000 euro për Ansamblin e Këngëve dhe Valleve “Ilirida”.

Dokumenti zyrtar i nënshkruar nga Aliu e konfirmon këtë fakt, ndërsa përfaqësues i autorizuar dhe drejtor ekzekutiv i kësaj OJQ-je është pikërisht Besnik Brahimi.

Siç ka mësuar Demokracia.com, vetëm një ditë pas këtij vendimi, më 14 gusht, Besnik Brahimi ka shpallur publikisht në rrjetet sociale kandidaturën e tij për Asamblenë Komunale të Shtimes në listën zgjedhore të kryetarit Qemajl Aliu.

Në publikimin e tij, Brahimi ka falënderuar kryetarin Aliu dhe e ka quajtur atë “kampion”, duke konfirmuar se është pjesë e listës fituese të Vetëvendosjes.

Pra, siç shihet subvencionet komunale, në kohe fushate janë orientuar për një kandidat të partisë në pushtet, duke ngritur dyshime për konflikt të interesit dhe përdorimin e parasë publike në funksion të pushtetit komunal.

I kontaktuar nga Demokracia.com, Rrahman Jakupi, nga Partia Demokratike e Kosovës (PDK) ka kërkuar hetim urgjent nga Prokuroria dhe organet e auditimit, pasi sipas tij, është e papranueshme që paraja publike të shndërrohet në mjet për blerje të ndikimit politik. Ai ka kërkuar edhe nga Agjencia për Parandalimin e Korrupsionit që të trajtojë këtë rast për konflikt të interesit