Kuvendi i Kosovës do të mbajë dy seanca plenare gjatë kësaj jave. Të enjten do të mbahet seanca e re plenare, ku pritet të diskutohet për Projektligjin buxhetin për vitin 2023, ndërsa të premten do të trajtohen pikat e mbetura nga seancat e kaluara, mes tyre edhe debati parlamentar për shëndetësinë.

Pas mbledhjes së Kryesisë së Kuvendit, ku u vendos për seancat plenare, deputeti i Lëvizjes Vetëvendosje, Adnan Rrustemi, bëri të ditur se është orientuar agjenda edhe për seancën plenare të 24 nëntorit, ku do synohet votimi i dy kandidatëve për gjyqtar në Gjykatën Kushtetuese.

“Kryesia mori vendim që këtë javë të kemi dy seanca, të enjten seancë plenare, ndërsa të premten, vazhdim i pikave të papërfunduara nga seancat e mëhershme. Ndërkohë që po ashtu diskutoi dhe orientojë rendin e ditës për seancën e 24 nëntorit të javës tjetër. Natyrisht, të enjten do të kemi vetëm Projektligjin për buxhetin për vitin 2023, natyrisht përveç pyetjeve parlamentare dhe atyre jashtë rendit të ditës. Pastaj të premten do të kemi një diskutim për gjendjen në shëndetësi dhe disa projektligje të mbetura”, tha ai.

Në fjalën e tij, shefi i Grupit Parlamentar të PDK-së, Abelard Tahiri, adresoi kritika ndaj Qeverisë së Kosovës për menaxhimin me shëndetësi, për çka tha se kanë iniciuar debat parlamentar të premten për këtë dikaster.

“Si Grup Parlamentar i PDK-së kemi kërkuar votimin e një rezolute që ka të bëjë me gjendjen në shëndetësi në Kosovë. Ju e shihni se tashmë një kohë të gjatë ky sektor jashtëzakonisht i rëndësishëm është mbetur pa ministër dhe nuk e ka fokusin fare të kryeministrit dhe Qeverisë së Kosovës. Është e pa tolerueshme që për një periudhë kaq të gjatë në këtë sektor të rëndësishëm të mbetet pa ministër. Tash e sa kohë fokusi i qeverisë ka humbur fare, kemi një degradim të shërbimeve dhe kemi një situatë më të rëndë që po krijohet dhe po ndikon në xhepin e qytetarëve”, theksoi Tahiri.

Ndërkohë, shefi i Grupit Parlamentar të AAK-së, Besnik Tahiri, foli për buxhetin për vitin 2023, për të cilin tha se i njëjti është pa vizion dhe pa reflektuar në gjendjen që është sot.

“Ky është një buxhet totalisht pa vizion dhe i pa reflektuar në gjendjen që është sot Kosova. Janë disa argumente. Argumenti i parë është deklarata skandaloze e ministrit të Financave, ai del e iu thotë sektorit privat dilni dhe rritni rrogat se iu ka rritë fitimi. Përderisa në këtë buxhet dhe sesion nuk e ka sjell ligjin e pagave që e ka në dorë. Pra ministri Murati e ka në dorë ngritjen e pagave në sektorin publik dhe po ashtu e ka buxhetin për këtë punë. As nuk e ka sjell vinë buxhetore për këtë ligj dhe mbi të gjitha as nuk ka sjell koeficientet”, theksoi ai.

Nga ana tjetër, i pyetur nga gazetarët, deputeti i LVV-së, Adnan Rrustemi, foli për planin franko-gjerman për dialogun Kosovë-Serbi. Ai tha se i njëjti nuk është në fazën e njoftimit të Kuvendit të Kosovës.

“Nuk është në fazën e njoftimit të Kuvendit të Kosovës, ne kemi informacione për aq sa është diskutuar në publik, vlerësimit dhe deklarimit të kryeministrit në rastin konkret”, tha Rrustemi.