Në fjalimin e tij tradicional “Urbi et Orbi” (“Për qytetin dhe botën”) nga ballkoni i Bazilikës së Shën Pjetrit në Romë, Papa Françesku bëri thirrje sot për t’i dhënë fund luftës në Ukrainë. dhe gjetkë në botë, duke thënë se “bota dëshiron paqen”.

“Le të shikojmë në fytyrat e të gjithë fëmijëve të botës që dëshirojnë paqen. Le të shikojmë në fytyrat e vëllezërve dhe motrave tona ukrainase që po e kalojnë këtë Krishtlindje në errësirë dhe të ftohtë, larg shtëpive të tyre për shkak të shkatërrimit të luftës që po vazhdon prej 10 muajsh”, u tha Papa dhjetëra-mijëra besimtarëve që u mblodhën në Sheshi i Shën Pjetrit për të dëgjuar fjalët e tij.

Ai shtoi se lufta në Ukrainë “nuk duhet të errësojë konfliktet e tjera në botë”.

Papa bëri thirrje gjithashtu për rinovimin e dialogut midis izraelitëve dhe palestinezëve në tokën e shenjtë të lindjes së Jezu Krishtit.

“Ndërsa shumë janë ulur në një tryezë të pasur festive, një sasi e madhe ushqimesh në botë hidhen çdo ditë dhe jepen para për armatim”, deklaroi Papa i zhgënjyer.

Ai u bëri thirrje besimtarëve që kuptimin e Krishtlindjes të mos e kërkojnë në “shkëlqimin e rremë të festës”, por në ndihmën e të pastrehëve, emigrantëve, refugjatëve dhe të varfërve që kërkojnë ngushëllimin dhe mbrojtjen tonë.