Kryetari i Partisë Demokratike të Kosovës, Memli Krasniqi sa i përket fillimit të sesionit vjeshtor të seancave të Kuvendit të Kosovës, është shprehur se debati parlamentar lidhur me grevat është i domosdoshëm.

Lideri i PDK-së në një intervistë për “RTK Prime”, tha se do të ishte e padrejtë nëse nuk do të diskutohej për grevat dhe refuzimin e dialogut social nga qeveria, sepse është një çështje që ka prekur secilin qytetar të Kosovës.

“Ne nuk mund të marrim vendime ekzekutive në Kuvend, por ne mund të rrisim vetëdijesimin për një çështje, t’i ballafaqojmë argumentet. Unë shpresoj shumë që edhe pa këtë diskutim do të duhej të kishte zgjidhje. Besoj. Por, ajo që po më shqetëson është mungesa e zgjidhjes, pra ideja e istikamizimit, e betonizimit, që kryeministri e ka pozicionin e vet dhe thotë s’lëvizi prej këtu, nëse doni pakon, llogariteni që po ua përmbushi si kërkesë, tjerat shohim në të ardhmen”, theksoi ai.

Krasniqi propozoi që kryeministri Kurti në vend të aplikimit të pakos aktuale financiare komplet të pastrukturuar, të diskutojë me sindikatat për një shumë që do të ofrohej si ndihmë për 4 muajt e ardhshëm deri në miratimin e Ligjin për Paga.

“Unë po zotohem edhe në emër të PDK-së që nëse ai e bën një marrëveshje të tillë me procedurë të shpejtuar do të punojmë bashkë për të miratuar atë ligj, dhe e miratojmë ta zëmë në muajin nëntor”, tha ai.

Krasniqi akuzoi Kurtin për keqpërdorim të parasë publike me qëllim të blerjes së paqes sociale.

“Ai ka marrë një çek të bardhë që kurrë s’ka ndodhë në historinë e Kosovë, dy herë, një herë 100 milionë, tash 150 milionë euro, pa miratim të Kuvendit për me vendosë qysh don ai me i nda këto mjete, për me e ble paqen sociale në fund të fundit”, shtoi kryetari i PDK-së.