Embargoja për arin rus, që është eksporti i dytë më fitimprurës i vendit pas burimeve të energjisë, do t’i mohojë Rusisë aksesin në 19 miliardë dollarë të ardhura në vit.

Kështu ka thënë Sekretari i Shtetit të SHBA, Antony Blinken në një intervistë për CNN, ndërsa liderët e G7 pritet të ndalojnë importet e arit rus.

Shumica e arit të saj Rusia e eksporton tradicionalisht në G7. Ndërprerja e këtij fluksi të të ardhurave është e rëndësishme, theksoi Blinken.

Sanksionet e paprecedentë dhe kontrollet e eksportit kanë një ndikim të thellë në Rusi, shtoi kryediplomati.

“Edhe pse merr të ardhura nga nafta me çmime më të larta, Rusia nuk është në gjendje t’i shpenzojë ato për shkak të kontrolleve të eksportit. Ajo nuk mund të marrë atë që i nevojitet për të modernizuar sektorin e saj të mbrojtjes, për të modernizuar teknologjinë e saj, për të modernizuar eksplorimin e saj të energjisë, që do të thotë se me kalimin e kohës secila prej këtyre zonave do të bjerë”, tha Blinken.

Tashmë, ka parashikime se ekonomia ruse do të tkurret me tetë deri në pesëmbëdhjetë për qind vitin e ardhshëm. Rubla është duke u mbështetur artificialisht me shpenzime të mëdha. Një mijë kompani të mëdha ndërkombëtare janë larguar nga Rusia dhe standardi i jetesës për rusët po bie.

“E gjithë kjo ka një efekt menjëherë, por gjithashtu ka një efekt kumulativ”, vuri në dukje Blinken.