Kampioni i Kosovës Ballkani nuk ka arritur të shënojë fitore ndaj skuadrës nga Malta, Hamrun, në kuadër të raundit të dytë kualifikues në Ligën e Konferencës.
Pavarësisht që ishin favorit të padiskutueshëm, “Xhebrailat” nuk arritën më shumë se një barazim, kësisoj duhet të fitojnë në ndeshjen kthyese nëse duan avancimin tutje.
Ballkani ishte skuadër shumë më e mirë gjatë tërë kohës, mirëpo që assesi s’ia doli ta gjejë rrugën drejtë rrjetës.
Pavarësisht aksioneve të njëpasnjëshme, sulmuesit nuk mundën t’i finalizonin rastet. Rastin më të mirë e kishte Lindon Emërllahu, me këtë të fundit që dështoi nga pika e bardhë.
Mundësi tjetër kishte edhe Walid Hamidi, mirëpo që goditja doli të jetë qendrore me portierin mysafir që ishte gjithmonë në vendin e duhur.
Ndërkohë, Hamrun në këtë përballje duket se hyri për t’u mbrojtur duke mos krijuar ndonjë rast konkret.
Kësisoj, Ballkani avancimin tutje duhet ta sigurojë me një fitore në ndeshjen kthyese që zhvillohet pas një jave në Maltë.