Lajme

VV kërkon kandidat konsensual për president

Deputetja e Lëvizjes Vetëvendosje, Arbërie Nagavci, ka shkruar sot në profilin e saj në Facebook, se parita e saj është e gatshme të flas për postin e Presidentit, po që janë të interesuar ta gjejnë nje kandidat konsensual.

“Ne jemi të interesuar të punojmë seriozisht në gjetjen e një kandidati ose kandidateje të denjë, konsensuale e që paraqet unitetin e popullit, ashtu si e kërkon kushtetuta”, shkruan Nagavci.

Andaj pasi të jemi dakorduar plotësisht për qeverisjen, mund të angazhohemi seriozisht për pozitën e të parit apo të parës së vendit.

“Data 26 dhjetor është dita kur duhet të konstituohen institucionet e vendit. Jo vetëm Kuvendi, por paraprakisht të jetë arritur dhe marrëveshja për bashkëqeverisje në mes të LV! dhe LDK- së.

Si fitues të zgjedhjeve dhe si partia e parë në vend jemi të angazhuar e përkushtuar të arrimë marrëveshjen për bashkëqeverisje me LDK-në, të marrim përsipër përgjegjësitë që na janë besuar dhe të fillojmë punën e cila do të jetë e shumtë e jo e lehtë. Duke ditur sfidat që na presin, është tejet e rëndësishme që të kemi mirëbesim paraprak e përkushtim për të qeverisur me profesionalizëm, dinjitet e transparencë. Kjo arrihet duke respektuar partnerin, duke bërë propozime, duke gjetur pikat që na ofrojnë e duke hapur mundësitë e bashkëpunimit”, shkruan ajo.

Sipas saj, kushtëzimet e barrikadimet janë e kundërta e këtyre më sipër, andaj dhe duhet të shmangen.

Ajo ka sqaruar se LV në interes të arritjes së marrëveshjes së bashkëpunimit me LDK-në, janë pajtuar që të propozojmë për kryesues/e të Kuvendit një kandidat/e të LDK-së, ndonëse kjo e drejtë na takon neve si fitues të zgjedhjevez, dhe jemi pajtuar të ndajmë përgjegjësitë udhëheqëse ministrore në mënyrë të barabartë.