Gazetari dhe profesori serbo-boshnjak, Dinko Gruhonjiç, gjithashtu njohës i zhvillimeve politike në Ballkanin Perëndimor, në një prononcim për gazetën malazeze “Pobjeda”, ka thënë se Kisha Ortodokse Serbe (KOS) luan rol të rëndësishëm në përshkallëzimin e situatës në rajon, veçanërisht në Kosovë, Mal të Zi dhe Bosnje-Hercegovinë.
“Ajo është një lojtare vendimtare në Malin e Zi. Presidenti i Serbisë, Aleksandër Vuçiç, po përdor KOS-in për të destabilizuar Ballkanin Perëndimor, kryesisht Bosnjë dhe Hercegovinën, Malin e Zi dhe Kosovën, por edhe Maqedoninë e Veriut – megjithëse situata atje është e qetë për momentin, por unë nuk jam i sigurt se kështu do të mbetet”.
KOS-i ka vazhduar propagandën viktimizuese edhe pas sulmit terrorist të 24 shtatorit në Banjë të Zveçanit – komunë e banuar me shumicë serbe – në pjesën veriore të Kosovës, duke pandehur se qëllimi i Qeverisë së Kosovës është që “kisha serbe dhe besimtarët e saj të zhduken nga Kosova”, duke shtuar se “keqkuptimet” në Kosovë duhet të zgjidhen me dialog.
Kujtojmë se Patriarku i Kishës Ortodokse Serbe Porfirije në muajin tetor të vitit të kaluar është fronëzuar në Patriarkanën e Pejës, ku në fjalimin e tij u bëri thirrje “vëllezërve shqiptarë” dhe popullit serb që të luten për paqe, mirëpo, ai është fokusuar prej kohësh në promovimin dhe zbatimin e ideologjisë nacionaliste të “Serbisë së Madhe” në aktivitetet e tij publike.