Nënkryetarja e PDK-së, Vlora Çitaku, ka kritikuar kryeministrin Albin Kurti, i cili renditi shtatë pika përmes së cilave synon “normalizimin e Marrëdhënieve drejt vitit 2024” me Serbinë. Kurti për nxjerrjen e këtyre pikave u nxit nga deklaratat e fundit të emisarit të BE-së, Miroslav Lajçak.
Çitaku tha se kjo mënyrë e hartimit të kushteve e të cilat s’po merren parasysh nga ndërmjetësit e bën Kurtin “palaço”.
“Kryeministri Kurti i paska postu edhe nja 7 pika të reja: janë joserioze! Në fakt, ai vetë është joserioz. Një palaço jo-qesharak”, ka shkruar Çitaku.
Ajo tha se kryeministrin “s’po e merr askush seriozisht”, derisa tha se ai është vonuar dhe se për këtë qytetarët e Kosovës po i vuajnë pasojat.
Postimi i plotë:
Kryeministri Kurti i paska postu edhe nja 7 pika të reja: janë joserioze!
Në fakt, ai vet është joserioz. Një palaço jo-qesharak. Qe një kronologji:
1. Për 6-7 vjet, Albin Kurti ka përdorur dhunë kundër çfarëdo marrëveshje të ndihmuar nga aleatët, duke mos kursyer asgjë dhe askënd: Është derdhur edhe gjak nëpër rrugë, janë hedhur bomba, gaz lotsjellës dhe është thirrur në luftë vëllavrasëse.
2. Pas ardhjes në pushtet, tash Albin Kurti thotë që nuk e ka prioritet dialogun, dhe zbulon formula të ndryshme, përfshi “pesë kushte”, “tre principe”, “gjashtë pika” dhe zbulime të tjera të cilat janë harruar ca ditë më pas, ngase askush s’i ka marrë seriozisht – madje as ai.
3. Për dy vjet aleatët perëndimorë dhe qytetarët e presin Kryeministrin Kurti të marrë vendim dhe t’i japë drejtim dialogut, i cili ka pasur synim njohjen e ndërsjellë. E vonon procesin dhe krijon drama të përditshme, duke reduktuar dialogun në çështje teknike.
4. Pasi që përlahet me Lajçak, Borrell dhe gjysmën tjetër të botës, e si pasojë Kosovës i sjell edhe sanksione ndërkombëtare të cilat ende janë në fuqi, në një aksham pazar, pa kurrfarë koordinimi dhe me një paturpësi të pashoq, e pranon një statut të draftuar nga vetë Lajçak, të cilin e quante pro-serb, për autonomi pa njohje të ndërsjellë.