Zyrtarët ukrainas njoftuan se synojnë të rrisin prodhimin vendas të dronëve në vitin 2024.
Është pjesë e një plani më të madh për të mbrojtur Ukrainën kundër Rusisë dhe rritja e prodhimit do të përqendrohet në dronët FPV (pamja e personit të parë) të destinuara për zbulim dhe sulm.
Këtë e ka bërë të ditur ministri ukrainas i Industrisë Strategjike, Oleksandr Kamishin, i cili këtë e ka konfirmuar përmes rrjeteve sociale.
“Në dhjetor kemi prodhuar më shumë se 50 mijë dronë FPV. Përveç kësaj, vitin e ardhshëm do të prodhojmë më shumë se 10 mijë dronë sulmues me rreze të mesme dhe më shumë se 1000 drone me rreze të gjatë. Të gjitha kapacitetet e prodhimit janë gati”, shkroi ai.
“10 mijë dronët e rinj me rreze të mesme (disa qindra kilometra) do të sulmojnë forcat ruse dhe janë pjesë e një plani ambicioz për të “mbytur” një numër të madh mjetesh ajrore pa pilot (UAV). Ukraina gjithashtu planifikon të prodhojë më shumë se 1000 drone me një rreze veprimi prej 1000 kilometrash”, pohoi ministri.
Siç tha Kamishin, Ukraina prodhoi më shumë se 50 mijë dronë FPV në muajin dhjetor, por për të përmbushur qëllimin për të prodhuar një milion drone në vitin 2024, prodhimi duhet të rritet me më shumë se 30 për qind.
Megjithatë, Kyiv Post shkruan se përpjekjet për të rritur prodhimin e dronëve janë të “vonuara” kur bëhet fjalë për forcat e vijës së parë. Sfidat me të cilat përballen ushtarët ukrainas për shkak të mungesës së avionëve ndonjëherë rezultojnë në situata kërcënuese për jetën.
Fushata “Ushtria e Dronëve” mori donacione monetare për të financuar blerjen e dhjetëra dronëve të fluturimit të lartë, duke përfshirë dronët e konsumit të DJI. Këta dronë i janë dhuruar Ukrainës nga organizata të ndryshme, por dyshohet se kjo nuk mjafton më në luftën e përshkallëzuar.