Përfaqësuesi i OVL UÇK-së, Faton Klinaku i ka reaguar këshilltarit të kryeministrit Albin Kurtit dhe ish-komandantit të UÇK-së, Aziz Bici, i cili ka kërkuar që të pastrohen listat e veteranëve të pastrohen, duke deklaruar se batalionin që e udhëhiqte në luftë kishte 250 ushtarë, ndërsa në listat e veteranëve figurojnë 600.
Klinaku ka thënë se pjesë e të njëjtit batalion ishte edhe ai dhe ka rikujtuar se Bicaj ishte anëtar i komisionit vlerësues për verifikim, ndërsa ai jo.
Sipas Klinakut, me deklaratën e Bicajt duhet të merret Prokuroria.
“Individët mund të devijojnë, por mund edhe të flasin pasaktësi që t’i përshtaten pushtetit. Sa i përket asaj që ka deklaruar Aziz Bici se në batalionin e tij ishin 250 ushtarë (e që në atë batalion isha edhe unë) e sipas tij ia paska bërë komisioni numrin 600 e vet ishte komision për vlerësim e verifikim e unë nuk kam qenë, nuk dua të merrem unë tash në publik, sepse për këtë pasaktësi të madhe i reagova edhe në takim që kishim me kryeministrin Kurti, por me këtë do të duhej që të merreshin të tjerët(komandantë e ushtarë të batalionit). Nga pozita që e kam unë, dhe duke pasur parasysh që si OVL UÇK kemi kërkuar hetim nga prokuroria dhe prandaj ka proces gjyqësor që duhet të përfundojë, nuk dua të merrem por do të ishte mirë të publikohet ajo listë prej atyre 250 vetave, e të shihen se cilët nga ata qindra ushtarët do të mbeten jashtë saj, por edhe për këtë mendoj se duhet të merret prokuroria”, ka shkruar Klinaku në Facebook.
Sipas Bicajt, me këto çështje nuk duhet të bëhen lojëra politike, teksa ka thënë se për pastrimin e listave të veteranëve duhet të merren organet e drejtësisë e jo fjalët në media.
Lojërat politike me këtë çështje, nuk i bëjnë nderë askujt. Edhe kryeministrit ia kemi bërë të qartë se propozimin që do të na japin me shkrim, duhet të jetë në përputhje me rikthimin e pikës 3.1 të nenit 16 A, që kjo qeveri e ky kuvend e ka ndryshuar, dhe për çdo pastrim liste janë organet e drejtësisë, e jo fjalët në media.
