Këshilltari amerikan për sigurinë kombëtare, Jake Sullivan, tha se një marrëveshje “armëpushimi afatgjatë” midis Izraelit dhe Hamasit është “e vetmja rrugë e besueshme përpara” pas një misioni izraelit të shpëtimit të katër pengjeve.
Zyrtarët e Gazës thonë se operacioni izraelit për shpëtimin e pengjeve la të vdekur të paktën 274 njerëz.
“Mënyra më e mirë për t’i kthyer të gjithë pengjet në shtëpi dhe për të mbrojtur civilët palestinezë është t’i jepet fund kësaj lufte. Dhe mënyra më e mirë për t’i dhënë fund kësaj lufte është që Hamasi t’i thotë ‘po’ marrëveshjes së shpallur nga presidenti Biden dhe që Izraeli e ka pranuar, e cila përcakton një udhërrëfyes për një armëpushim të qëndrueshëm dhe kthimin e të gjithë pengjeve”, tha Sullivan për CNN.
Presidenti amerikan Joe Biden, zbuloi propozimin trefazor në fund të muajit të kaluar, duke thënë se Izraeli e kishte paraqitur planin.
Komentet e kryeministrit izraelit Benjamin Netanyahu që atëherë kanë lënë disa dyshime mbi nivelin e tij të mbështetjes për propozimin, siç parashtrohet nga Biden.
Sullivan pranoi se civilë u vranë gjatë operacionit ushtarak të Izraelit të shtunën, ndërsa tha se Hamasi, i cili mori pengjet gjatë sulmeve të tij vdekjeprurëse të 7 tetorit në Izrael, po i vinte palestinezët në rrezik.
“Vetë presidenti ka thënë ditët e fundit se populli palestinez po kalon një ferr të plotë në këtë konflikt, sepse Hamasi po vepron në një mënyrë që i vendos ata në konflikt, që mban pengje pikërisht në zemër të zonave të mbushura me civilë”, shtoi ai.
I pyetur nëse SHBA-të ishin të kënaqura me mënyrën se si u krye misioni, Sullivan bëri thirrje për një zgjidhje diplomatike “ku nuk ka nevojë për operacione ushtarake për të nxjerrë çdo peng të fundit”.