Lidhur me shuarjen e ndërmarrjes energjetike “NKEC”, deputeti nga radhët e LDK-së, Avdullah Hoti, ka thënë se partia në pushtet ka përgjegjësi për mijëra euro, sipas tij të shpenzuara kot dhe siç është shprehur ai, auditori ka rekomanduar para shumë kohësh shuarjen e saj.
Deputeti i Lidhjes Demokratike të Kosovës (LDK), Avdullah Hoti, ka reaguar pas shuarjes së ndërmarrjes energjetike “NKEC”.
Sipas Hotit, që kur është ndërprerë projekti i termocentralit “Kosova C” nuk ka pasur asnjë shkak për ekzistencën e kësaj ndërmarrjeje energjetike.
Deputeti i LDK-së ka thënë se partia në pushtet ka përgjegjësi për mijëra euro, sipas tij të shpenzuara kot dhe siç është shprehur ai, auditori ka rekomanduar para shumë kohësh shuarjen e saj.
Ai ka shtuar se Qeverisë i ka “rënë ndërmend” për këtë pas ballafaqimit që kishin në Kuvend.
“Fatkeqësisht, ky është vetëm njëri nga shumë rastet e abuzimit me paranë publike”, ka thënë Hoti.
Ndërkohë, Qeveria e Kosovës, në mbledhjen e sotme ka vendosur që ta shpërbëjë ndërmarrjen energjetike “NKEC”.
Kjo ndërmarrje prej vitesh ishte pa funksion, por vetëm brenda vitit 2022 ia ka harxhuar buxhetit të shtetit afër 100 mijë euro në paga për shtatë anëtarë të saj.
Lexo më shumë: Qeveria shuan ndërmarrjen energjetike “NKEC”
Ndërmarrja energjetike “NKEC” është themeluar si shoqëri aksionare në vitin 2018 nga qeveria e atëhershme, me qëllim të marrjes së të gjithë energjisë elektrike të prodhuar nga termocentrali “Kosova e Re”, si ndërmjetësuese në mes të Qeverisë së Kosovës dhe Contour Global, kompani kjo që ishte angazhuar për ndërtimin e termocentralit “Kosova e Re”.
Pas shkëputjes së marrëveshjes në mes të Qeverisë Kurti dhe Contour Golbal, stafi i “NKEC” vazhdon të paguhet, pa punuar.