Sekretari amerikan i Mbrojtjes, Lloyd Austin, ka thënë se i vjen “thellësisht keq” që nuk e ka njoftuar Shtëpinë e Bardhë kur ai u shtrua në spital në dhjetor.
Austin, 70 vjeç, u lirua muajin e kaluar teksa vazhdon të shërohet nga trajtimi për kancerin e prostatës.
“Unë nuk e kam trajtuar këtë drejtë,” tha ai. “Duhet t’i kisha thënë presidentit për diagnozën time të kancerit.”
Shefat e Pentagonit supozohet të jenë të qasshëm në një moment për të trajtuar çdo krizë të sigurisë kombëtare.
“Unë marr përgjegjësinë e plotë dhe u kërkoj falje shokëve të ekipit dhe popullit amerikan,” tha Austin në konferencën e tij të parë për shtyp që nga kthimi në punë.
“Si rregull nuk flas për biseda me shefin tim, por mund t’ju them se i kam kërkuar falje drejtpërdrejt presidentit Biden.
“Dhe i kam thënë se më vjen shumë keq që nuk e njoftova menjëherë se mora një diagnozë të rëndë dhe po merrja trajtim”.
Austin tha se ai kurrë nuk kishte urdhëruar askënd në stafin e tij për të fshehur kohën e tij në spital nga Shtëpia e Bardhë apo publiku, por nuk iu përgjigj pyetjeve nëse punonjësit kishin vepruar jashtë urdhrave të tij.
“Unë nuk mendoj se kam krijuar një kulturë të fshehtësisë,” u tha ai gazetarëve të enjten.
Sekretari i Mbrojtjes është pak më poshtë presidentit në zinxhirin komandues për ushtrinë amerikane dhe konsiderohet si një nga anëtarët më të rëndësishëm të kabinetit, shkruan BBC.