Një grup shtetasish rusë anti-Putin, të cilët janë në linjë me ushtrinë ukrainase, ka marrë përgjegjësinë për një sulm në rajonin jugperëndimor rus të Belgorodit.
Granatimet dëmtuan një ndërtesë administrative, disa ndërtesa banimi dhe një kopsht fëmijësh në zonë, sipas guvernatorit rajonal Vyacheslav Gladkov, i cili tha se nuk kishte viktima, shkruan CNN, transmeton Klan Kosova.
Në një postim në Telegram, grupet që e quajnë veten “Legjioni i Lirisë së Rusisë” dhe “Trupat Vullnetare Ruse” thanë se kishin “çliruar” një vendbanim në rajonin Belgorod, i cili kufizohet me Ukrainën.
Një zyrtar ukrainas pranoi se njësitë kishin kryer një operacion në zonë, por këmbënguli se ata po vepronin në mënyrë të pavarur.
“Ne mund të konfirmojmë se ky operacion është kryer nga shtetas rusë”, tha për CNN Andriy Yusov, një përfaqësues i agjencisë së inteligjencës së mbrojtjes të Ukrainës.
Ai tha se njësitë ishin “pjesë e forcave të mbrojtjes dhe sigurisë” kur ishin në Ukrainë, por ishin të pavarura nga Kievi.
Zëdhënësi i Kremlinit, Dmitry Peskov, tha se forcat e Kremlinit po punonin për të larguar një “grup sabotazhi dhe zbulimi”, sipas medias shtetërore TASS.
Situata në Belgorod shënon “herën e parë” që forcat e linjës ukrainase kanë nisur “një operacion tokësor ndërkufitar kundër objektivave ruse”, sipas Sam Kiley të CNN.