Jo vetëm fyerje dhe vulgaritet, në Uashington, republikanët po studiojnë me kujdes, dhe me ankth, “efektin” Kamala. Analistët nga qendrat konservatore të studimit shkëmbejnë mendime dhe krahasojnë skenarët e mundshëm.
Disa prej tyre janë veçanërisht të motivuar: ata shpresojnë të marrin një vend në administratën e ardhshme të Trump, natyrisht nëse ai fiton zgjedhjet e nëntorit. Një prej tyre është Stephen Dewey, themelues i GeoFinancial dhe administrator i Bastiat, instituti amerikan për kërkime ekonomike.
Dewey punoi për 40 vjet në burokracinë federale, duke u marrë me aktivitete rregullatore. Tani ai është pjesë, ndër të tjera, në ekipin e fondacionit Heritage që përgatiti “Project 2025”, një program qeveritar konservator për qeverinë e ardhshme të Donald Trump.
Ish-zyrtari pranon se Kamala Harris do të jetë një kundërshtare më e ashpër se Biden. Nuk është vetëm çështja e moshës. Harris mund të ndërtojë një bllok votimi në nivel social, duke mobilizuar gratë, të rinjtë, afrikano-amerikanët dhe nga pikëpamja gjeografike, duke e kthyer në demokrat veriun industrial të vendit, i cili tani dukej se ishte pushtuar nga republikanët.
Të njëjtin mendim ndan edhe Marc Wheat, drejtor i Advancing American Freedom, një institut kërkimi i krijuar nga ish-zëvendëspresidenti Mike Pence.
Stafi i Kamalas tashmë është vonë dhe prandaj do të përpiqet të angazhojë mbi të gjitha sindikatat, pra të vetmet organizata që kanë aftësi për të mobilizuar shpejt votuesit.
Kjo është arsyeja pse ka shumë gjasa që Harris të zgjedhë si zëvendës të saj dikë që ka qenë në dialog me drejtuesit e sindikatave për disa kohë, një figurë si guvernatori i Pensilvanisë, Josh Shapiro, për shembull. Dhe në fakt, disa ditë më parë Kamala ishte në Hjuston, në konventën vjetore të Federatës Amerikane të Mësuesve, me 1.7 milionë mësues të regjistruar në shkollat fillore dhe të mesme.
Por ka një pasazh që shqetëson veçanërisht “inteligjencën” republikane. Kamala Harris vjen nga drejtësia e Kalifornisë, ku ajo u dallua për ashpërsinë e saj kundër krimit. Prandaj, mund të prezantohej në mënyrë të besueshme si garantuesi më i mirë i sigurisë dhe të depërtonte në klasën e mesme urbane të Amerikës më të thellë, në rajonet e Midwest ose Jugut, me pak fjalë, një konkurrent i frikshëm në një nga terrenet të cilët janë mbështetësit më të zjarrtë të Trump.