Palestinezët kanë shpërndarë një projekt-rezolutë të OKB-së që kërkon që Izraeli t’i japë fund “pranisë së paligjshme” në Gaza dhe Bregun Perëndimor, brenda gjashtë muajve.
Rezoluta e propozuar e Asamblesë së Përgjithshme, e cila u mor nga Associated Press, pason një vendim të gjykatës më të lartë të Kombeve të Bashkuara në korrik që tha se prania e Izraelit në territoret palestineze është e paligjshme dhe duhet të përfundojë.
Në dënimin gjithëpërfshirës të sundimit të Izraelit mbi tokat që ai pushtoi 57 vjet më parë, Gjykata Ndërkombëtare e Drejtësisë tha se Izraeli nuk kishte të drejtë për sovranitet mbi territoret dhe po shkelte ligjet ndërkombëtare kundër marrjes së tokave me forcë.
Ajo tha gjithashtu se ndërtimi i vendbanimeve izraelite duhet të ndalet, raporton AP.
Ambasadori izraelit në OKB, Danny Danon e denoncoi rezolutën dhe e përshkroi atë si një “shpërblim për terrorizmin”. Ai bëri thirrje që rezoluta të refuzohet.
“Le të jetë e qartë: Asgjë nuk do ta ndalojë Izraelin apo ta pengojë atë nga misioni i tij për të sjellë pengjet në shtëpi dhe për të eliminuar Hamasin”, tha ai.
Sekretari i Përgjithshëm i OKB-së, Antonio Guterres i tha Associated Press të hënën se vendimet e Gjykatës Ndërkombëtare të Drejtësisë “duhet të pranohen dhe duhet të zbatohen”.
Sa i përket rezolutës së Asamblesë së Përgjithshme, tha ai, u takon 193 vendeve anëtare të OKB-së të marrin një vendim.