Kryeshefi i Ndërmarrjes Publike Banesore (NPB), Artan Berisha, thotë se po përballen me dy sfida shumë të mëdha, që sipas tij, po ndikojnë në performancën e kësaj ndërmarrje.
Berisha, tha se për disa objekte që janë pronë e NPB-së pronarët ilegal të tyre ka kohë që nuk janë duke paguar qiranë, pavarësisht ftesave që u kanë bërë për takime.
“Sfidë janë disa lokale që janë problematike, janë disa pronar që nuk i lirojnë lokalet, nuk paguajnë gjë, nuk përgjigjen ndërmarrjes. Këtë çështje e kemi ngritur edhe me kryetarin e komunës, kemi kërkuar ndihmë edhe nga komuna që të na ndihmojnë t’i lirojmë ato lokale. Ato nuk kanë kontekste ato janë lokale të pastra të ndërmarrjes po janë disa njerëz, që fatmirësisht nuk janë shumë që nuk i përgjigjen ndërmarrjes, ushtrojnë veprimtari dhe nuk paguajnë as qira. Jemi në proces që ta zgjidhim edhe këtë problem”.
Ai tha se janë 10 objekte që pronarët e tyre nuk paguajnë qira, që sipas tij, NPB-ja i ka ofruar edhe shumë mundësi të tjera që ata të shlyejnë borxhin.
“Ne kemi harxhuar të gjitha mjetet ligjore, i kemi lutur, prej se kam ardhur unë kam provuar që t’i takoj, nuk lajmërohen, nuk përgjigjen ata veprimtarin e vetë e ushtrojnë mos të them lirishtë ilegale në ato objekte. Nuk janë shumë mund të sillen rreth 10 objekte, por për ndërmarrjen janë shumë sepse nuk mund t’i inkasojmë të hyrat mujore. Ne varemi nga të hyrat mujore, këto mund të na dobësojnë në performancë”, tha ai.
Sfidë tjetër sipas Berishës, është edhe përballja me kontekste gjyqësore me pronat që janë tjetërsuar, pasi një pjesë e arkivës është humbur gjatë viteve 1997-98.
Ai tha se problem në këtë rast është edhe zgjatja e proceseve gjyqësore nga gjykata.
“Kemi shumë kontekste gjyqësore shumë banesa, e kemi rastin edhe të Dardanisë që ka qenë edhe medial ku janë pesë hyrje të tëra që janë, mos të them të uzurpuara, por janë njerëz të vendosur aty, se nuk mund ti quajmë uzurpim se nuk dihet pronari. I kemi edhe shumë vende të tjera në Prishtinë që janë tjetërsuar pronat, diku janë rreth 1 konteste gjyqësore që janë duke u zhvilluar. Duke pasur parasysh ngadalësimin e proceseve gjyqësore, në kontekstet civile shkojnë pak ma kadale dhe pak më vështirë gjinden provat sepse të dy palët pretendojnë se kanë të drejtë, të dyja palët kanë dokumente”, tha ai për EO.