Kult

Ndahet nga jeta aktorja e njohur shqiptare

Është ndarë nga jeta në moshën 82-vjeçe aktorja shqiptare, Filika Dimo.

Dimo ka ndërruar jetë në Belgjikë, ku jetonte prej vitesh, ka bërë të ditur Teatri “Aleksandër Moisiu” në Durrës.

“Me hidhërim të thellë njoftojmë ndarjen nga jeta të aktores Filika Dimo e cila prej disa vitesh jetonte në Belgjikë”, thuhet në postimin në Facebook të Teatri të Durrësit.

Pas diplomimit, ajo filloi të punojë në Teatrin popullor të Tiranës e më pastaj edhe në Teatrin “Aleksandër Moisiu” në Durrës, ku e ndau skenën edhe me shumë aktor të tjerë të njohur si: Nikolin Xhoja, Spiro Urumi, Kadri Pirro, Marta Burda, Lazër Vlashi, Gaqo Spiro etj.

Debutimin e saj në kinematografinë shqiptare ajo e bëri në vitin 1959 me rolin e “Shpresës” në filmin “Fortuna”.

Ajo luajti në katër filma të tjerë artistikë. Filmi qe e bëri më të njohur dhe më të vlerësuar atë si aktore, është filmi televiziv me 2 seri i RTSH-së “Koha nuk pret”, me rolin e “Beatrice Shmid, një rol epokal, më i miri i realizuar në kinemanë shqiptare.