Ish-presidenti i SHBA-së, Barack Obama, pritet të japë së shpejti mbështetjen e tij për zëvendëspresidenten, Kamala Harris, që të bëhet kandidatja demokrate për presidente në zgjedhjet e vitit 2024, sipas raportimeve të fundit.
Obama ishte presidenti i parë afro-amerikan i Amerikës kur u zgjodh në detyrë në vitin 2008 në një fitore historike për demokratët dhe miratimi i tij është vendimtar për nënpresidenten e SHBA-së, e cila tani po përpiqet të bëhet presidentja e parë grua e Amerikës dhe gruaja e parë afro-amerikane me origjinë indiane që zë Shtëpinë e Bardhë.
Obama privatisht ka mbështetur plotësisht kandidaturën e Harris dhe ka qenë në kontakt të rregullt me të, tha një raport nga NBC, duke cituar njerëz që janë në dijeni me diskutimet.
Ndihmësit e Obamës dhe Harris kanë diskutuar gjithashtu për të organizuar që ata të dy të shfaqen së bashku në fushatën elektorale, megjithëse nuk është caktuar një datë”, thuhet në raport dhe gjithashtu Reuters ka raportuar.
Meqë askush nuk doli për të sfiduar Harrisin për nominimin, ajo fitoi mbështetjen e delegatëve të partisë të hënën, një ditë pasi Joe Biden njoftoi se do të hiqte dorë nga kandidatura e tij për rizgjedhje, pas së cilës ai mbajti një fjalim para kombit të hënën mbrëma nga Zyra Ovale.
Fondacioni Obama, organizata bamirëse e ish-presidentit, nuk iu përgjigj një kërkese për koment nga Reuters, raportoi më tej agjencia e lajmeve.