Që nga janari i këtij viti, qytetarët e Kosovës mund të udhëtojnë pa viza në vendet e Evropës.
Por, duket që këtë mundësi kosovarët do ta shfrytëzojnë edhe për pushimet verore, të cilat mund t’i kalojnë edhe në vendet tjera.
E për këtë, ambasadori i Malit të Zi në Kosovës, Robert Çobaj takoi gjatë javës përfaqësues nga Lidhja e Bizneseve të Kosovës.
Aty diskutuan edhe për mundësinë e rritjes së bashkëpunimit në këtë fushë, kryesisht për sezonën verore.
Pas takimit, ambasadori malazez u shpreh se edhe këtë vit, pritet të ketë vizitorë nga Kosova në bregdetin e Ulqinit.
“Ne jemi së pari shumë të gëzuar që Kosova ka fituar liberalizimin e vizave dhe që qytetarët e Kosovës mund të vizitojnë vende të ndryshme të botës por ne e dimë që në fund do të kthehen edhe në Ulqin sepse ekziston shprehja që vetëm nëse vini në Ulqin e llogarisni që ishin në pushimet verore”, ka thënë ai.
Derisa këtë shqetësim e ndau edhe kreu i Lidhjes së Bizneseve të Kosovës, Besart Dreshaj i cili tha se ky ishte edhe qëllimi i këtij takimi.
“Edhe kjo ishte ndër temat që biseduam gjatë takimit dhe ambasadori e ka shprehur gatishmërinë që me institucionet e Malit të Zi dhe ne me institucionet e Republikës së Kosovës që t’i heqim të gjitha barrierat të cilat janë në mes të dy shteteve që qytetarët e dy vendeve të mos kenë pengesa gjatë kalimit të kufijve dhe qytetarëve t’i mbetet vetëm një gjë, që t’i vizitojnë bregdetin e Malit të Zi i cili i ofron të gjitha kushtet për të gjithë turistët e Republikës së Kosovës”, ka deklaruar ai.
Mali i Zi mbetet një prej vendeve të preferuara për pushim tek kosovarët.