Juristja e medias, Flutura Kusari ka thënë se ka fituar në rastin kundër mostransparencës së Radiotelevizionit të Kosovës.
Kusari përmes një shkrimi në llogarinë e saj në Facebook, ka thënë se RTK ka kthyer përgjigje, pas njoftimit për pasoja ligjore nga Agjencia për Informim dhe Privatësi.
“Fitova në rastin kundër mostransparencës së RTK-së
RTK-ja sot është përgjigjë në kërkesën time për qasje në informaten sa është buxheti i Festivalit të Këngës 2024 përmes Agjencisë për Informim dhe Privatësi, pasi kjo agjencia e njoftoi për shqiptimin e dënimit dhe pasojat ligjore.
Përgjigjen nuk ma ofruan mua por agjencisë.” – ka thënë ajo fillimisht.
Tutje, Kusari u shpreh se në përgjigjen e RTK-së, është thënë se buxheti i Festivalit të Këngës 2024 është 350 mijë euro.
Megjithatë, ajo ka njoftuar se do ta verifikojë këtë informacion.
“Buxheti i festivalit sipas RTK-së është 350,000 euro.
Sigurisht që këtë informacion do ta verifikoj tutje.
Faleminderit AIP për korrektësinë dhe shpejtësinë e trajtimit të ankesës.” – ka shkruar ajo.