Lajme

Kurti takohet me ambasadorin britanik, flasin për qeverinë e re

Në Ambasadën e Mbretërisë së Bashkuar në Republikën e Kosovës, kryetari i Lëvizjes Vetëvendosje, Albin Kurti, ka zhvilluar një takim me ambasadorin britanik, Nicholas Abbot.

Lëvizja Vetëvendosje ka njoftuar se në këtë takim është biseduar për marrëdhëniet bilaterale ndërmjet dy vendeve, si dhe për mundësitë e zgjerimit dhe thellimit të tyre me qeverisjen e re. “U bisedua edhe për procesin e formimit të koalicionit qeverisës dhe sfidat e mbetura drejt seancës konstituive të Kuvendit më 26 dhjetor 2019. Kryetari Kurti, si kryeministër i ardhshëm, shprehu interesimin për të bashkëpunuar me qeverinë e re britanike të dalë nga zgjedhjet e 12 dhjetorit e që do të udhëhiqet nga kryeministri i ri z. Boris Johnson”, është thënë në njoftimin e Vetëvendosjes.

Sipas këtij njoftimi, Kurti ka përkujtuar një pjesë domethënëse të fjalimit të Boris Johnson, asokohe ministër i Punëve të Jashtme, mbajtur në Kuvendin e Kosovës, më 10 nëntor 2016: “Duhet të jetë e pakundërshtueshme të thuash që të gjithë ata që janë fajtorë për krime lufte, nga të gjitha anët, duhet të burgosen. Unë do të them të njëjtën gjë në Beograd, dhe në të gjithë Ballkanin. (…) Dua të shfrytëzoj këtë rast për të ngushëlluar familjen dhe miqtë e Astrit Deharit, i cili së fundi vdiq në paraburgim. Unë miratoj thirrjet e bëra nga të gjitha palët për një hetim transparent mbi vdekjen e tij”, ka cituar Kurti fjalët e Jonsonit.