Kryeministri gjeorgjian, Irakli Kobakhidze, u zotua të dielën të qojë përpara një ligj për “agjentët e huaj” që ka nisur një krizë politike, pasi kundërshtarët e projektligjit u mblodhën në një nga protestat më të mëdha të parë që nga pavarësia nga Bashkimi Sovjetik në vitin 1991.
Kobakhidze tha në një konferencë televizive se partia në pushtet “Ëndrra Gjeorgjiane” do të siguronte miratimin e projektligjit në një lexim të tretë këtë javë dhe u tha protestuesve se do të kenë ndjekje penale nëse ata përdorin dhunën.
Opozita e Gjeorgjisë u ka bërë thirrje kundërshtarëve të projektligjit që të organizojnë protesta gjatë gjithë natës jashtë parlamentit për të penguar ligjvënësit të hyjnë në ndërtesë të hënën, kur ata do të fillojnë debatin për leximin e tretë të projektligjit.
Projektligji kërkon që organizatat që marrin më shumë se 20% të financimit të tyre nga jashtë të regjistrohen si agjentë të ndikimit të huaj ose të përballen me gjoba ndëshkuese.
Vendet perëndimore dhe opozita e Gjeorgjisë e denoncojnë atë projektligj si autoritare dhe të frymëzuar nga Rusia. Kritikët e krahasojnë atë me ligjin rus të vitit 2012 për “agjentët e huaj”, i cili është përdorur për të gjurmuar kritikët e Kremlinit të Vladimir Putinit, shkruan Reuters.