Kryetari i PDK-së, Memli Krasniqi, ka kujtuar legjendën e futbollit Fadil Vokrri, në gjashtë vjetorin e vdekjes, shkruan Scanner.
Në një postim në Facebook, Krasniqi ka kujtuar se Fadil Vokrrin, si shumica e moshatarëve të mi, fillimisht e kam pasur idol, nga koha kur babai më merrte në stadium për të shikuar KF Prishtinën.
“Fadili na frymëzoi përmes shembullit – se e pamundura është vetëm një fjalë dhe asgjë më shumë”, ka shkruar Krasniqi, transmeton Scanner.
Postimi i plotë:
Fadil Vokrrin, si shumica e moshatarëve të mi, fillimisht e kam pasur idol, nga koha kur babai më merrte në stadium për të shikuar KF Prishtinën.
Magjia e tij në fushë, të madh e të vogël na bënte të ëndërrojmë! Të paktën për 90 minuta, dhjetëramijëra tifozë ndjeheshim të paprekshëm e të fuqishëm.
Fadili na frymëzoi përmes shembullit – se e pamundura është vetëm një fjalë dhe asgjë më shumë.
Fati im i mirë deshi që më vonë Fadilin ta kem një prej miqve të mirë e bashkëpunëtorëve më të shquar.
Shumë vite pasi ishte ndezur flaka e rezistencës sportive në fushën e blertë, pata nderin e jashtëzakonshëm jetësor që krah për krah me Fadilin, të punojmë fort për ndërkombëtarizimin e futbollit kosovar, që kulmoi me anëtarësimin në UEFA dhe FIFA.
Ikja e tij e hershme 6 vite më parë, ka lënë një zbrazëtirë të madhe tek të gjithë që e njohëm dhe është akoma vështirë e pranueshme. Pa dyshim, futbolli i Kosovës ka humbur më së shumti nga mungesa e tij.
Do të t’kujtoj gjithmonë për mirësinë, bujarinë dhe përkushtimin tënd të pashoq, Fadil – kumbara i futbollit të Kosovës.
Shpirti yt jeton me ne në çdo gol të shënuar të kombëtares sonë, në çdo ndeshje të luajtur dhe në çdo zemër që ke frymëzuar. 🙏