Kryetari i PDK-së, Memli Krasniqi, vlerëson se barrikadat e vendosura në pjesën veriore të vendit duhet të hiqen sikur ishte bërë në vitin 2018, duke i larguar me forcë.
Ai, në Rubikon të Klan Kosovës, ka theksuar se nëse kryeministri Albin Kurti nuk mund ta bëjë këtë tash duhet të japë dorëheqje.
“Nëse nuk mund t’i heqë, ta dorëzojë mandatin. Çfarë të duhet kryeministri që dorëzohet para bandave kriminale. Nëse nuk je në gjendje t’i luftosh, nuk je në gjendje të jesh kryeministër”, është shprehur Krasniqi.
Krasniqi ka shtuar se kur Kurti ka marrë qeverinë pjesa veriore e vendit ka qenë e integruar.
Sipas tij nëse barrikadat nuk hiqen para Vitit të Ri, atëherë situata mund të përkeqësohet.