Shtetet e Bashkuara kanë rrëzuar një balonë të dyshuar spiune kineze në brigjet e shtetit amerikan të Karolinës së Jugut, një javë pasi ajo hyri në hapësirën ajrore të SHBA dhe shkaktoi një sagë dramatike spiunazhi që përkeqësoi marrëdhëniet midis Pekinit dhe Uashingtonit.
Ky veprim nxiti një qortim të menjëhershëm nga Kina, e cila paralajmëroi për përgjigjet “e nevojshme” dhe këmbënguli se “fluturakja civile pa pilot” ishte një balonë kërkimore e motit që kishte humbur në hapësirën ajrore të SHBA-së “krejtësisht aksidentalisht”, raporton Aljazeera.
Balona, e cila kishte fluturuar në rreth 18 mijë e 300 metra në afërsi të brigjeve të Karolinës së Jugut.
Presidenti i SHBA-së Joe Biden u tha gazetarëve se ai kishte lëshuar një urdhër të mërkurën për të rrëzuar balonën, por Pentagoni kishte rekomanduar të pritej derisa të mund të bëhej mbi ujë të hapur për të mbrojtur civilët nga përplasja e mbeturinave në Tokë.
“Ne e hoqëm atë me sukses dhe dua të komplimentoj aviatorët tanë që e bënë atë”, tha Biden në Maryland.
Rrëzimi erdhi menjëherë pasi qeveria amerikane urdhëroi ndalimin e fluturimeve rreth bregut të Karolinës së Jugut për shkak të asaj që tha në atë kohë se ishte një “përpjekje e pazbuluar e sigurisë kombëtare”. Fluturimet rifilluan pasditen e së shtunës.
Pamjet televizive treguan një shpërthim të vogël, i ndjekur nga rënia e balonës drejt ujit. Agjencia e lajmeve Associated Press tha se një operacion ishte duke u zhvilluar në ujërat territoriale të SHBA në Oqeanin Atlantik për të rikuperuar mbeturinat nga balona.
Sekretari amerikan i Mbrojtjes Lloyd Austin e quajti operacionin një “veprim të qëllimshëm dhe të ligjshëm” që erdhi si përgjigje ndaj “shkeljes së papranueshme të sovranitetit tonë nga Kina”.
Ai tha se balona po përdorej nga Kina “në një përpjekje për të mbikqyrur vendet strategjike në Shtetet e Bashkuara kontinentale”.