Kryeministri i Kosovës, Albin Kurti bashkë me vartësin e tij, Hekuran Murati, njoftoi të martën për rritje pagash për punëtorët e sektorit publik, ku nga janari 2025 atyre do t’u shtohen nga 55 euro bruto, ndërsa nga korriku i vitit tjetër edhe 55 € të tjera.
Këtë vendim të pushteti aktual po e kritikon ish-ministri i Financave, Haki Shatri, i cili i konsideron si ‘premtime para martesor’.
Shatri thotë se rritja prej 55 eurosh nuk mjafton krahas rritjes së çmimeve.
“Këto janë premtime paramartesore se nuk realizohen asnjë, por edhe nëse po, ajo 55 euro nuk vlen asgjë krahas çmimeve e inflacionit dhe nuk është e mjaftueshme. Është premtim parazgjedhor për me i joshë qytetarët”, u shpreh Shatri.
Tutje, Shatri thotë se ky nuk është vendim, por premtim, pasi sipas tij, koeficienti duhet të aprovohet në Kuvend dhe në buxhetin e ri.
“Këto janë premtime sepse rritja duhet të jetë me vendim, që koeficienti i ri të hy në buxhet për 2025-twn, kur aprovohet në Kuvend”, deklaroi Shatri.
Për rritjen e pagës në sektorin privat kanë reaguar Sindikatat, duke shprehur pakënaqësitë e tyre.
Rrahman Jasharaj, kryetar i SBASHK-ut, shprehu kritika lidhur me vendimin e qeverisë për rritjen e pagave.
‘’55 euro ngritje nga janari është një ngritje e pa pranueshme për ne dhe sindikata jonë shpreh kundërshtimin e plotë nda këtij veprimi të kryeministri Kurti dhe ministrit Murati pra jemi thellësisht të pakënaqur me deklaratën e tyre dhe aq më shumë kur ky vendim vlen nga janari ‘’, tha Jasharaj për Front Online.