Shumica e evropianëve janë skeptikë ndaj një lufte NATO-Rusi, duke besuar se konflikti në Ukrainë do të zgjidhet nëpërmjet negociatave, sipas një studimi të ri të kryer nga Këshilli Evropian për Marrëdhëniet me Jashtë (ECFR), transmeton Anadolu.
Studimi i ECFR-së, i titulluar “Kuptimi i sovranitetit: Pikëpamjet ukrainase dhe evropiane të luftës së Rusisë ndaj Ukrainës”, u bazua në sondazhe të kryera nga organizatat ndërkombëtare të kërkimit të opinionit, duke përfshirë Datapraxis, YouGov, Norstat, Alpha Research dhe Rating Group, në vendet evropiane, si Bullgaria, Republika Çeke, Estonia, Franca, Gjermania, Britania, Greqia, Italia, Polonia, Portugalia, Holanda, Spanja, Suedia, Zvicra dhe Ukraina.
Studimi i publikuar të mërkurën tha se shtetasit evropianë kanë shprehur dyshimet e tyre mbi triumfin ushtarak të Ukrainës mbi Rusinë në fushën e betejës, me afërsisht një e treta deri në gjysmën e pjesëmarrësve të sondazhit që besojnë se lufta do të përfundojë nëpërmjet një zgjidhjeje të negociuar.
Ndjenjat ishin veçanërisht të forta në Greqi (49%), Itali (48%), Bullgari (46%) dhe Spanjë (45%). Vetëm Estonia kishte një përqindje të lartë (38%) të të anketuarve që besonin se Ukraina do ta fitonte luftën.
Shumica e 11 prej 15 vendeve të përzgjedhura evropiane besojnë se negociatat janë rezultati më i mundshëm.
Në Itali, 18 për qind e të anketuarve besojnë se lufta në Ukrainë do të përfundojë “brenda vitit të ardhshëm”, ndërsa 22 për qind thonë se “Rusia do ta fitojë luftën” dhe 3 për qind kanë shprehur pikëpamjet e tyre se Ukraina mund të fitojë në fushën e betejës.
Shumica e evropianëve ishin kundër rritjes së kostove të mbrojtjes në përgjigje të konfliktit në Ukrainë. Polonia (53%), Estonia (45%), Suedia (41%) dhe Gjermania (40%) përbëjnë përjashtimet e vetme, duke mbështetur rritjen e shpenzimeve të mbrojtjes “edhe nëse kjo do të thotë të shkurtohen fondet në fusha të tjera si shëndetësia, kujdesi, edukimi dhe parandalimi i krimit”.
Megjithatë, shumica e njerëzve në vende të tjera, duke përfshirë Italinë, Greqinë, Spanjën dhe Zvicrën, ishin kundër rritjes së kostove të mbrojtjes. Edhe në vendet që kanë mbajtur qëndrim të fortë antirus, shumica dërrmuese e njerëzve janë kundër pjesëmarrjes në terren në Ukrainë për të luftuar ushtrinë ruse.
Angazhimi i trupave u kundërshtua gjithashtu nga 54 për qind e qytetarëve suedezë dhe 90 për qind e bullgarëve. Një shumicë prej 80 për qind në Itali kundërshtoi vendosjen e trupave në Ukrainë, por evropianët ishin në favor të ofrimit të ndihmës teknike për ushtrinë ukrainase.