Pas bastisjeve nga Prokuroria Speciale e Hagës në shtëpitë e dy ish-këshilltarëve të ish-Presidentit të Kosovës, Hashim Thaçi, ka reaguar edhe Artan Behrami, po ashtu ish-këshilltar i Thaçit, i cili përdori tone të ashpra ndaj Gjykatës Speciale, që madje e quajti edhe “gjykatë fashiste” e cila “përndjek, arreston dhe dënon vetëm shqiptarët”.
Bastisjet në shtëpitë e Blerim Shalës dhe Besnik Smakës, Behrami i quajti “skandaloze dhe të paprecedentë” ndërsa shtoi se “kjo qasje e prokurorisë është një dëshmi e qartë se ka një tendencë për të njollosur të gjithë shqiptarët që kanë dhënë kontribut për liri dhe shtetndërtim”.
Reagimi i Behramit:
Gjykata Speciale është fashiste, sepse përndjek, arreston dhe dënon vetëm shqiptarët.
Prokuroria është në panik! Po humb çdo betejë juridike! Ndërsa, gjykata në përpjekje për të ndihmuar prokurorinë, seancat tragjike-komike po mundohet t’i mbulojë me spektakle.
Bastisja e shtëpive të kolegëve, Blerimit dhe Bashkimit, është skandaloze dhe e paprecedent!
Blerim Shala ka qenë pengesë vetëm për regjimin e Millosheviqit dhe ky regjim e kishte arrestuar atë disa herë.
Për katër dekada, Shala ka qenë njëra ndër figurat intelektuale që ka dhënë një kontribut të pashlyeshëm në rrugën për liri, pavarësi dhe shtetndërtim!
Ndërsa, Bashkim Smakaj është ndër njerëzit më profesionist që njoh në fushën e sigurisë, njeri që ka ndërtuar shumë institucione të sigurisë në Kosovë nga themelet!
Tani kjo qasje e prokurorisë është një dëshmi e qartë se ka një tendencë për të njollosur të gjithë shqiptarët që kanë dhënë kontribut për liri dhe shtetndërtim.
Unë dhe kolegët e mi që kemi pasur nderin të bashkëpunojmë me presidentin Thaçi, nuk frikësohemi nga trokitjet e kësaj prokurorie në dyert e shtëpive tona.
Ata nuk kanë policë për të bastisur të gjithë shqiptarët, ata nuk kanë prokurorë për të akuzuar të gjithë shqiptarët, ata nuk kanë burgje për të mbajtur të gjithë shqiptarët, që mbrojnë luftën çlirimtare të Kosovës!