Ministrat e jashtëm të Francës dhe Gjermanisë thanë të shtunën se megjithëse Izraeli ka të drejtën e vetëmbrojtjes, gjithashtu ka një përgjegjësi për të mbrojtur popullsinë civile të Gazës.
Në një fjalim drejtuar liderëve në samitin e paqes në Kajro, ministrja e Jashtme gjermane, Annalena Baerbock, theksoi se Hamasi mban përgjegjësinë përfundimtare për “vuajtjet e këtyre javëve të fundit”.
“Ishte Hamasi ai që solli terror të tmerrshëm mbi Izraelin më 7 tetor duke kryer krime mizore. Si çdo vend tjetër në botë, Izraeli ka të drejtë të mbrojë veten dhe të mbrojë popullin kundër këtij terrori brenda kornizës së ligjit ndërkombëtar,” tha Baerbock.
Baerbock paralajmëroi se kjo “luftë kundër Hamasit duhet të kryhet me konsideratën më të madhe të mundshme për situatën humanitare për burrat, gratë dhe fëmijët e pafajshëm në Gaza”.
Ministrja e Jashtme e Francës, Catherine Colonna, përsëriti gjithashtu se “ssgjë nuk e justifikon terrorizmin. Përballë terrorizmit, Izraeli ka të drejtë të mbrohet”.
“Izraeli, në përgjigjen e tij legjitime ndaj sulmit terrorist, duhet të mbrojë popullsinë civile në përputhje me ligjin humanitar”, vazhdoi Colonna.
Franca “dënon veprimet e Hamasit”, por vazhdon “të mbështesë të drejtat e popullit palestinez siç kemi bërë gjithmonë,” vuri në dukje Colonna, duke shtuar se Franca së shpejti do të dërgojë 10 milionë euro shtesë ndihmë për palestinezët.